ԵՐԵՎԱՆ, 22 սեպտեմբերի – Sputnik. Մոսկվայի պետական համալսարանը (ՄՊՀ) պատրաստ է Հայաստանին առաջարկել հեռավար բժշկական դիագնոստիկայի նոր տեխնոլոգիա` «Առողջության տնակ»։ Այդ մասին Sputnik Արմենիային հայտնեց ՌԴ ԳԱ ակադեմիկոս, Ուրոլոգների ռուսաստանյան ընկերության փոխնախագահ, ՄՊՀ–ի գիտակրթական «Համալսարանական կլինիկա» կենտրոնի տնօրեն Արմայիս Քամալովը։
Պրոֆեսոր Քամալովն ամեն առիթ օգտագործում է Հայաստանի և իր հայրենակից կոլեգաների հետ համագործակցությունը խորացնելու համար։ Երկու տարի առաջ ՄՊՀ–ի կլինիկան բանակցություններ էր սկսել հայաստանյան գործընկերների հետ` հեռավար դիագնոստիկայի սարքերի մատակարարումների և փորձարկումների մասին։ Հիմա Քամալովը ցանկանում է նոր թափ հաղորդել այդ բանակցություններին։
Նախկինում ստեղծած դիագնոստիկ տվիչները ՄՊՀ–ի ինժեներներն ու բժիշկները միավորել են մեկ համալիրի մեջ։ Արդյունքում ստացված "Առողջության տնակում" կարելի է չափել ավելի քան տասը պարամետր` էլեկտրակարդիոգրամ, առիթմիայի յոթ տեսակ, արյան մեջ շաքարի և թթվածնային հագեցվածության մակարդակը (վերջինս շատ կարևոր է հատկապես Covid-ի դեպքում) և անգամ տեսողությունը։ "Տնակի" գործիքակազմն անընդհատ համալրվելու է, ընդ որում` այն կարելի է տեղադրել ոչ միայն հիվանդանոցներում կամ պոլիկլինիկաներում, տեսականորեն` ցանկացած վայրում։
Ստացված տվյալները կարելի է փոխանցել բժիշկներին 200 կիլոմետր հեռավորության վրա։ Կապի համակարգը նախագծել են ՄՊՀ–ի ֆիզիկոսները` տրոպոսֆերային կապի հիման վրա։ Ինտերնետից այդ տեխնոլոգիան տարբերվում է նրանով, որ բժշկական գաղտնիք ներկայացնող տվյալները հնարավոր չէ որսալ, իսկ դրանց փոխանցման շառավիղը թույլ է տալիս այդ սարքերն օգտագործել թե՛ Հայաստանի, թե՛ անգամ Ռուսաստանի հեռավոր գյուղերում։
Տվյալները կարող են ընդունել և եզրակացություններ տալ մարզային հիվանդանոցների բժիշկները, ինչպես նաև Երևանի բժշկական համալսարանի մասնագետները, որոնց հետ ՄՊՀ–ի բժիշկները երկարամյա համագործակցության փորձ ունեն։
«Հայաստանում, ինչպես նաև Ռուսաստանում, ամեն տեղ չէ, որ հնարավոր է կառուցել ժամանակակից բժշկական կենտրոններ, իսկ այդպիսի դիագնոստիկ կաբինետները հասանելի կդարձնեն բժշկական ծառայությունները և բուժման ուղեգրերը», - հավելեց Քամալովը։
Մոսկվայի համալսարանն արդեն փորձարկել է այդ համակարգն իր ուսանողական հանրակացարանում։ Հայաստանում այդ համակարգը կիրառելու համար անհրաժեշտ է ոչ միայն Երևանի բժշկական համալսարանի, այլև առողջապահության նախարարության մասնակցությունը, որը կօգներ ստեղծել այդպիսի դիագնոստիկ կետերի հանրապետական ցանց, ընդգծեց Քամալովը։
ԵՊԲՀ–ի հետ համագործակցության մեկ այլ ուղղություն է «հետքովիդյան» վերականգնողական թերապիան, որն օգնում է կանխել կորոնավիրուսի հետևանքով սրված հիվանդությունները։ Այժմ Քամալովի ղեկավարած կլինիկայում ակտիվորեն փորձարկում են հելիումաթթվածնային խառնուրդը բուժիչ շնչառության համար։ Հելիումը տոքսիկ չէ (որովհետև իներտ գազ է) և չի ախտահարում թոքերը, իսկ քանի որ այն շատ թեթև է, ապա դրա խառնուրդն էլ է ավելի թեթև, քան մաքուր թթվածինը, ուստի հիվանդներն ավելի հեշտությամբ են կարողանում այն շնչել։
Փորձարկումները վկայում են, որ այդ խառնուրդն օգնում է մաքրել բրոնխները և բարելավում է շնչառական համակարգի հյուսվածքների միկրոշրջանառությունը։ Վերջինս շատ կարևոր է, որովհետև քովիդային թոքաբորբն ուղեկցվում է թոքային հյուսվածքների միկրոտրոմբոզներով։
«Կորոնավիրուսի առանձին փուլում մենք սերտորեն գործակցում էինք, առցանց հանդիպումներ էինք անցկացնում ԵՊԲՀ–ի համալսարանական կլինիկայի բժիշկների հետ։ Հույս ունեմ, որ մեր գործնական շփումը կզարգանա։ Փորձի փոխանակումը կարևոր է ամեն մասնագիտությունում, իսկ բժշկության մեջ` հատկապես», - ընդգծեց Քամալովը։
Մոսկվայի համալսարանի նախագծած սարքերի փորձարկումների մասին բանակցությունները կշարունակվեն առաջիկայում։