Անհեթեթություն է անկախության տոնակատարության վրա նման մեծ միջոցներ ծախսել, երբ բազմաթիվ վիրավոր ու հաշմանդամ զինծառայողներ օժանդակության կարիք ունեն և չեն կարողանում գումար հայթայթել, Sputnik Արմենիայի հետ զրույցում նման տեսակետ հայտնեց ԱԺ «Հայաստան» դաշինքի պատգամավոր Գեղամ Նազարյանը։
Նազարյանի խոսքով` սեպտեմբերի 21-ին Հանրապետության հրապարակում գունագեղ շոու անցկացնելու գաղափարը հունից հանել է արցախյան պատերազմում զոհված հերոս զինվորների ծնողներին, թեև հսկայական ճնշումներ են գործադրվում նրանց վրա, որպեսզի լոյալ լինեն իշխանությունների հանդեպ, և բնական է, որ ոչ բոլորը կարող են դիմանալ։
Նրա համոզմամբ` առաջինը որդեկորույս ծնողներն են արժևորում, թե ինչ է երկիրը, ինչ է պետականությունն ու անկախության խորհուրդը, բոլորից շատ ցանկանում են, որ երկիրը հնարավորիս շուտ դուրս գա այս խայտառակ վիճակից։
Անդրադառնալով սեպտեմբերի 21-ին դեպի Եռաբլուր երթ կազմակերպելու գաղափարին` Նազարյանն ընդգծեց, որ Եռաբլուրը չպետք է արժեզրկվի ամեն տոնի պատրվակով, ի վերջո դա կարելի է անել սեպտեմբերի 27-ին, երբ մեկ տարի առաջ այդ օրը սկսվեց արցախյան 44-օրյա պատերազմը։
Նազարյանը նշեց, որ հերոս տղաների ծնողներին արել է որոշ առաջարկներ, որոնք քննարկելուց հետո, երբ բոլորը կլինեն համակարծիք, նա նոր կբարձրաձայնի այդ առաջարկների մասին։