Մահվան ելքերով ու ծանր վիրավորներով ՃՏՊ–ների զգալի մասն արձանագրվում է մայրաքաղաքից դուրս, որտեղ երթևեկության կազմակերպման պատասխանատուները ՏԻՄ–երն ու մարզպետարաններն են, ինչպես նաև տարածքային կառավարման նախարարությունը, որոնք իրենց դիտարկում են խաղից դուրս։ Sputnik Արմենիայի հետ զրույցում նման տեսակետ հայտնեց Սերգեյ Ղահրամանյանը` նշելով, որ ՃՏՊ–ների աճի առումով ոստիկանությունը միակ պատասխանատուն չէ։
«Ժանապարհային ոստիկանությունը վերահսկողություն իրականացնող մարմին է, այլ ոչ թե երթևեկություն կարգավորող ու կազմակերպող։ Ճիշտ է, ոստիկանությունն իր մասով երթևեկության կարգավորման գործընթացի մասնակից է, այդուհանդերձ մեզ մոտ վթարներին ու պատահարներին առնչվող մեծ խնդիրը կապված է երթևեկության սխալ կազմակերպման հետ, և դրա պատասխանատուն ամենևին ոստիկանությունը չէ։ Այստեղ նախևառաջ անելիքներ ունեն կառավարությունը, տարածքային կառավարման մարմինները, ՏԻՄ–երը, սա կառավարման հետ կապված խնդիր է, իսկ ոստիկանությունը միայն վերահսկողի, կարող է կոպիտ հնչել` տուգանողի և, որպես հետևանք, վթարներն արձանագրողի դերում է։ Ոստիկանության կողմից կանխարգելումը հանգում է նրան, որ վարորդները շարժվում են խախտումներ կատարելու դեպքում տուգանվելու կանխավարկածով»,– նշեց Ոստիկանության պետին կից հասարակական խորհրդի անդամը։
Ղահրամանյանի կարծիքով` ճանապարհային ոստիկանությունը, որպես վերահսկող մարմին, զերծ չէ թերացումներից, քանի որ կան վարորդներ, որոնք հակված են խախտումներ կատարելուն և առաջնորդվում են այն կանխավարկածով, որ իրենց ամեն ինչ թույլատրելի է, որ իրենք կարող են ամեն ինչ անել առանց պատշաճ արձագանքի կամ հակազդեցության։
Ըստ նրա` պատճառներից մեկն էլ տուգանային միավորների համակարգի ոչ լիարժեք ուժի մեջ մտնելն է, ուստի հիմա տասնյակ հազարավոր վարորդներ, որոնք զրկված են վարորդական իրավունքից, շարունակում են մեքենա վարել, և այդ հարցում, ըստ Ղահրամանյանի, մեղքի առյուծի բաժինը ոստիկանությանն է։
«Ազգային ժողովի հաստատմամբ հետաձգվեց ավտոմատ հետախուզման համակարգի ներդրումը պարեկային մեքենաներում, ինչի հետևանքով ունենք անօրինական վարքագիծ դրսևորող վարորդների բարձր աստիճանի անբացահայտելիություն, և սպառնալիք հանդիսացող վտանգավոր վարորդները շարունակում են մնալ երթևեկության մեջ»,– նշեց Ոստիկանության պետին կից հասարակական խորհրդի անդամը։
Նշենք, որ ՀՀ ոստիկանության պետ, ոստիկանության գեներալ-մայոր Վահե Ղազարյանը սեպտեմբերի 10–ին աշխատանքային խորհրդակցություն է անցկացրել, որի ժամանակ խիստ մտահոգություն է հայտնել՝ կապված ճանապարհատրանսպորտային պատահարների, զոհերի ու վիրավորների թվի աճի վերաբերյալ։ Քննարկվել է իրավիճակը, ներկայացվել են առաջարկություններ՝ խնդրի լուծման ուղղությամբ։
Վահե Ղազարյանը հանձնարարել է խնդրի շուրջ կազմակերպել հանրային քննարկումներ, իրականացնել պարբերական ուժեղացված ծառայություններ։