ԵՐԵՎԱՆ, 9 սեպտեմբերի – Sputnik. «Հայաստան» դաշինքի պատգամավոր, պրոֆեսոր Արմեն Չարչյանի առողջական վիճակը շատ վատ է։ Պրոֆեսորին տեսակցելուց հետո լրագրողներին հայտնեց «Հայաստան» խմբակցության պատգամավոր Վահե Հակոբյանը։
Նշենք, որ «Հայաստան» խմբակցության մի քանի պատգամավորներ այս պահին «Քանաքեռ–Զեյթուն» ԲԿ-ում են` պրոֆեսորին տեսակցելու։ Երեկ Չարչյանի պաշտպան Էրիկ Ալեքսանյանը հայտնել էր, որ Չարչյանի վիճակը կտրուկ վատացել է, և նա «Վարդաշեն» ՔԿՀ-ից տեղափոխվել է հիվանդանոց։
«Չարչյանը մարտական է տրամադրված, տրամադրությունը շատ լավ է, սակայն առողջական վիճակ շատ վատ է։ Նրա մոտ շատ են քրեակատարողական հիմնարկի աշխատակիցները, անթիվ են։ Գիտեմ միայն` բժիշկներն ամեն ինչ անում են, որ նրա շաքարն իջեցնեն։ Աստված գիտի` պրոֆեսորն ինչքան կմնա հիվանդանոցում»,–ասաց Հակոբյանը` հավելելով, որ հենց պրոֆեսորի առողջական վիճակը մի փոքր բարելավվի, նրան նորից կալանավայր են շտապելու տանել։
Հակոբյանը նշեց նաև, որ չնայած այս ամենին, Չարչյանը հետևում է քաղաքական իրադարձություններին։
«Հայաստան» դաշինքի պատգամավոր Արամ Վարդևանյանն էլ տեղեկացրեց, որ Չարչյանը դժվարությամբ էր խոսում, սակայն կարողացել է մի քանի բան իմանալ նրանից։
«Չարչյանը հիվանդանոց է տեղափոխվել գրեթե ուշագնաց վիճակում։ Սա արդյո՞ք նորմալ է։ Չարչյանի դեմ գործով մեղադրական դատավճիռ կայացնելու որևէ ապացուցման շեմ հաղթահարված չէ, և նման պայմաններում նրան կալանքի տակ պահելն իրավունքի հետ առնչություն չունի»,–ասաց Վարդևանյանը։
Նա հայտնեց նաև, որ հիմա ընթացքի մեջ է բժշկական հանձնաժողով ձևավորելու և փորձաքննություն իրականացնելու գործընթացը։