Լաուրա Սարգսյան, Sputnik Արմենիա
Համեղ խորովածի գլխավոր գաղտնիքը այս կամ այն համեմունքների օգտագործման մեջ չէ, և ոչ էլ նրա, թե ինչպես եք բաստուրմա դնում միսը, այլ մսի ճիշտ ընտրության։ Եթե խորովածը համեղ չի ստացվել, նշանակում է՝ սխալ միս է ընտրվել։
Հայտնի խոհարար բլոգեր, բելգիացի մեր հայրենակից Ժորժ Հարությունյանը Sputnik Արմենիայի հետ զրույցում նշեց, որ ամեն ինչում մինիմալիզմն է նախընտրում, այդ թվում նաև խորովածը բաստուրմա դնելու հարցում։ Քանի որ հին մսից պատրաստված խորովածը ոչ մի բաստուրմա չի փրկի։
«Անկասկած, համով խորոված է ստացվում թարմ ու երիտասարդ խոզից։ Սակայն այստեղ էլ ճիշտ կտոր պետք է ընտրել։ Օրինակ, խորովածն ավելի լավ է պատրաստել կողերից կամ վզից», – ասաց Հարությունյանը։
Ըստ նրա` դրանք ամենահյութալի կտորներն են, այդ պատճառով դրանցից պատրաստված ուտեստը շատ համեղ կլինի։ Խոզի թիակը հարմար է ջեռոցում պատրաստելու համար, մսի մնացած կտորներից լավ խճողակ է ստացվում։
Ինչպե՞ս ընտրել միսը։ Այդ գործընթացն իր առանձնահատկություններն ունի։ Նախ` չարժե վառ կարմիր միս վերցնել, պետք է նախապատվությունը տալ սփրթնած, մի փոքր ավելի վարդագույն կտորներին։ Հարությունյանը պարզաբանեց, որ շատ կարմիր միսը խոսում է այն մասին, որ այն կամ հին է, կամ վաճառասեղանին է հասել անասունին մորթելուց անմիջապես հետո։ Բացի այդ, առնվազն մեկ օր մթերքը պետք է սառնարանում մնա։
Երկրորդը` եթե միսը մատներով սեղմելիս զսպանակվում է և արագ հարթվում, ուրեմն այն թարմ է։
Երրորդը` միսն ընտրելիս պետք է ուշադրություն դարձնել կողերին։ Մատղաշ կենդանու կողերը բարակ և կլոր են, իսկ հաստ ու տափակը խոսում է ծեր անասունի մասին, նման մսից ուտեստ պատրաստելն ավելի շատ ժամանակ կպահանջի։
Բլոգերը կարծում է նաև, որ տոմատով կամ կիտրոնի հյութով, բազմթիվ համեմունքներով մարինադի տարատեսակ ձևերը առավել հարմար են մսից պատրաստված այլ ուտեստների համար` տապակի, ջեռոցում պատրաստելու և այլնի համար։ Խորովածի բաստուրմայի համար լավագույնը աղն ու պղպեղն են չորացրած ուրցի մի քանի տերևի հավելումով։ Հարությունյանը կարծում է, որ այդպես բացահայտվում ու ընդգծվում է բուն մթերքի համը։
Խորոված պատրաստելով հայերը հայտնի են ամբողջ աշխարհում։ 2009 թվականից Հայաստանում խորովածի փառատոն է անցկացվում։ Հենց հայկական խորովածն է 2019 թվականի սկզբին «Սննդի համաշխարհային ատլասի» վարկածով ճանաչվել հայկական ամենահայտնի ուտեստներից մեկը։