ԵՐԵՎԱՆ, 28 օգոստոսի – Sputnik. Ազգային ժողովի «Քաղաքացիական պայմանագիր» կուսակցության անդամ Խաչատուր Սուքիասյանի կողմից հնչեցված մեղադրանքները Վազգեն Սարգսյանի հասցեին առաջացրել է ոչ միայն ընդդիմադիրների, այլև հենց իշխանական ու մերձիշխանական որոշ գործիչների զայրույթը: Գրում է «Փաստ» թերթը։
Նշենք, որ Ազգային ժողովում կառավարության ծրագրի քննարկման վերջին օրն իր ելույթով հանրության ու տեղեկատվական դաշտի ուշադրության կենտրոնում հայտնվեց իշխանական պատգամավոր Խաչատուր Սուքիասյանը։
Վերջինս, ի թիվս այլոց, ԱԺ ամբիոնից, ապա նաև լրագրողների հետ ճեպազրույցում լուրջ մեղադրանքներ հնչեցրեց նաև Վազգեն Սարգսյանի հասցեին՝ նրան բացահայտ մեղադրելով պետական հեղաշրջման, ինչպես նաև բանակը քաղաքականության մեջ ներգրավելու մեջ։
«Փաստ» թերթի աղբյուրների փոխանցմամբ՝ այս հայտարարությունից հետո բավական սուր խոսակցություն է տեղի ունեցել Սուքիասյանի և իշխանական թիմում ներկայումս դիրքավորված հատկապես «հին գվարդիայի» ներկայացուցիչների միջև, որոնք նրան բաց տեքստով հասկացրել են, որ չեն հանդուրժի նման վարքագիծ, ինչպես նաև ակնարկել են, որ առաջին հնարավորության դեպքում փորձի ամեն կերպ խմբագրել սեփական մտքերը։
Նշենք, որ Սուքիասյանի դեմ դատական հայց է ներկայացնելու ՀՀ երրորդ նախագահ Սերժ Սարգսյանը՝ Ազգային ժողովում իր հասցեին արված հայտարարությունների կապակցությամբ: