ԵՐԵՎԱՆ, 28 օգոստոսի – Sputnik. ԱՊՀ երկրներից Մոսկվա տեղափոխված շուրջ 200 մարդ արտաքսվել է՝ իրավակարգի խախտման համար, 17500 մարդու արգելվել է մուտք գործել ՌԴ: Տեղեկությունը Մոսկվայի քաղաքապետ Սերգեյ Սոբյանինը հայտնել է իր անձնական բլոգում։
Ինչպես նշել է Սոբյանինը, վերջին շրջանում Ռուսաստանի մայրաքաղաքում տեղի են ունեցել մի քանի լուրջ իրավախախտումներ, զանգվածային ծեծկռտուք:
«Այսպես չի կարող շարունակվել։ Մեր երկրում նման հյուրերի ներկայությանը մենք ուրախ չենք։ Հետևաբար, ոստիկանությունը վերջին ամիսներին խիստ հսկողություն է իրականացնում։ Հարուցվել է 800 քրեական գործ, երկրից արտաքսվել է մոտ 200 մարդ, 17500 մարդու արգելվել է մուտք գործել ՌԴ» , - հայտնել է Սոբյանինը։
Դրա հետ մեկտեղ, նա նշել է, որ արտագնա աշխատանքի նպատակով ԱՊՀ երկրներից Մոսկվա են ժամանում հարյուր հազարավոր միգրանտներ, և նրանց մեծամասնությունն օրինապահ վարքագիծ է դրսևորում։
«Ինչ-որ մեկին այս խստությունը կորող է չափազանց թվալ։ Բայց այդպես է լինելու։ Մոսկվան հյուրընկալ քաղաք է, բայց բարի եղեք հյուրընկալվելիս պատշաճ վարքագիծ դրսևորել» , - հայտարարել է Սոբյանինը։
Հիշեցնենք, որ օրերս Մոսկվայում անհայտ պատճառներով միգրանտների մասնակցությամբ ծեծկռտուք էր տեղի ունեցել։ Արդյունքում յոթ միգրանտներ կալանավորել են 12 օրով, ծեծկռտուքի ևս հինգ ակտիվ մասնակիցների պատրաստվում են արտաքսել երկրից։
Ձերբակալվածները տեղափոխվել են Ռուսաստանի ՆԳՆ Մոսկվայի գլխավոր վարչության օտարերկրյա քաղաքացիների ժամանակավոր պահման վայր։