ԵՐԵՎԱՆ, 18 օգոստոսի - Sputnik. Գորիսի համայնաքի ղեկավարի տեղակալ Իրինա Յոլյանը չկալանավորվեց։ Այս մասին հայտնում են նրա փաստաբաններ Էրիկ Ալեքսանյանն ու Ժիրայր Ղարագյոզյանը։
Որոշումը կայացրել է Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարանի դատավոր Կարեն Ֆարխոյանը։
Այսպիսով, օգոստոսի 17-ին Գորիսի համայնքապետարանի շենքից բերման ենթարկված ու ձերբակալված 4 անձանցից միայն մեկի` Գորիսի փոխքաղաքապետ Մենուա Հովսեփյանի նկատմամբ դատարանը կալանավորումը կիրառեց որպես խափանման միջոց։
Գորիսի համայնքապետարանի աշխատակցուհիներ Արմինե Չոփչյանն ու Սուսաննա Մկրտչյանը դատարանի որոշմամբ ավելի շուտ էին ազատ են արձակվել։
Հիշեցնենք՝ Երևանի Կենտրոն և Նորք Մարաշ վարչական շրջանների ընդհանուր իրավասության դատարանն այսօր դատավոր Մնացական Մարտիրոսյանի որոշմամբ Գորիսի փոխքաղաքապետ Մենուա Հովսեփյանի նկատմամբ խափանման միջոց էր կիրառել կալանավորումը։
Իրինա Յոլյանը, Մենուա Հովսեփյանը, Գորիսի համայնքապետարանի աշխատակիցներ Արմինե Չոփչյանը և Սուսաննա Սարգսյանը ձերբակալվել են երեկ։
Յոլյանին մեղադրանք է առաջադրվել ՀՀ ՔՕ 179 հոդվածի 3-րդ մասի 1 կետով (յուրացնելը կամ վատնելը պաշտոնեական դիրքն օգտագործելով, առանձնապես խոշոր չափերով)։
Հովսեփյանին մեղադրանք է առաջադրվել ՀՀ ՔՕ 179 հոդվածի 3–րդ մասի 1 կետով (յուրացնելը կամ վատնելը պաշտոնեական դիրքն օգտագործելով, առանձնապես խոշոր չափերով) և ՀՀ ՔՕ 149.1 հոդվածի 2–րդ մասի 1–ին և 2-րդ կետերով (նախընտրական քարոզչությանը մասնակցելուն հարկադրելը, որը կատարվել է պաշտոնեական դիրքն օգտագործելով):