Քանի դեռ չենք կարողացել անվտանգության միջավայր ապահովել, ոչ մի խնդիր հետագայում հնարավոր չի լինի լուծել, իսկ ընդդիմությունը խորհրդարան է մտել իշխանափոխության դրոշակը ձեռքին և մտադիր չէ խորհրդարանում օրինաստեղծ աշխատանքով զբաղվել, այլ շարունակում է պայքարը իշխանափոխությունն ավարտին հասցնելու համար, Sputnik Արմենիայի հետ զրույցի ընթացքում ասաց քաղաքական գիտությունների դոկտոր, պրոֆեսոր Գարիկ Քեռյանը։
«Ստեղծվել է այնպիսի իրավիճակ, որ ընդդիմության և իշխանության միջև, նրանց գործողությունների միջև որևէ շոշափելի ընդհանուր նպատակ չկա, հետևաբար դժվար է նման փոխհարաբերությունների պայմաններում պատկերացնել, թե ինչպես են այդ քաղաքական ուժերն աշխատելու, եթե մեկի նպատակը մյուսին լռեցնելն է, կառավարության վրա ազդելու գործիքներից զրկելը, իսկ մյուսի նպատակն ամեն գնով նոր ճգնաժամի հասնելն է, ինչը կտանի նոր ընտրությունների կամ այլ ճանապարհով իշխանափոխության»,– ասաց քաղաքագետը։
Քաղաքագետի գնահատմամբ` ընդդիմության և իշխանության որակներն էականորեն տարբերում են նախորդ գումարման ԱԺ–ից. ներկա ընդդիմությունն անհաշտ է ու արմատական, մերժողական է ամեն ինչում, ուստի այդ մթնոլորտը խաթարում է նաև անվտանգությանն առնչվող խնդիրների քննարկման գործընթացը, մինչդեռ հասրակությունը քաղաքական ուժերից այդ հարցում ակնկալում է կոնսենսուս։ Նրա կարծիքով`Հայաստանի և Արցախի անվտանգության միասնական համակարգը փլուզվել է, այնինչ մենք ունեինք բազմաթիվ հնարավորություններ` խուսափելու վերջին պատերազմից։ Չստացվեց, որովհետև մեր դիվանագիտությունն ու ռազմաքաղաքական միտքը գտնվեց շատ ցածր մակարդակի վրա, քանզի կանխատեսումն ու հեռատեսությունը պարզապես զրոյական աստիճանի վրա էին։
Ի դեմս Ադրբեջանի` քաղաքակիրթ հարևան չունելանու հանգամանքը, ըստ Քեռյանի, մեզ մղում է ուժերի գերլարման, որպեսզի կարողանանք ճիշտ դաշնակիցների հետ արդյունավետ համագործակցելով` նրանց ու մեր շահերի համադրմամբ ապահովել մեր անվտանգության միջավայրը ու թեև Ադրբեջանը կառուցողական չէ, բայցևայնպես մենք պետք է գտնենք այս տարածաշրջանում գոյատևման համատեղելիության բանաձևը։