«Քաղաքացիական պայմանագիր» խմբակցության անդամ Վլադիմիր Վարդանյանն այսօր ԱԺ նիստում «Հայաստան» դաշինքի կողմից ԱԺ տնտեսական հարցերի մշտական հանձնաժողովի նախագահի պաշտոնում առաջադրված պատգամավոր, Սյունիքի նախկին մարզպետ Վահե Հակոբյանից հետաքրքրվեց նրա հայտարարագրում նշված Մարտիրոս Սարյանի ու Հովհաննես Այվազովսկու նկարների գեղարվեստական արժեքներով։
«Մի փոքր պատմեք այդ նկարների մասին. ստեղծագործական ո՞ր ժամանակահատվածներին են վերաբերում այդ նկարները, ո՞նց եք ձեռք բերել, արդյո՞ք կանխել եք դրանց արտահանումը ՀՀ–ից կամ ընդհակառակը` ներկրել եք Հայաստան, որպեսզի հայկական մշակութային ժառանգությունը պահպանվի։ Այս նկարների պրովինանսի հետ կապված ինչ–որ տվյալներ ունե՞ք, կամ ընդհանրապես ի՞նչ նկարներ են, որովհետև Այվազովսկու մոտ կան և՛ հայկական թեմատիկայով նկարներ, և՛ ծովանկարներ, Սարյանն էլ ունի ստեղծագործական որշակի փուլեր։ Ո՞ր փուլերին են վերաբերում այդ նկարները»,– հարցրեց Վարդանյանը։
Վահե Հակոբյանը ժպիտով արձագանքեց` նշելով, որ ուրախ է, որ իր ունեցվածքի նկատմամբ նման հետաքրքրություն է ցուցաբերվում, բայց և խոստովանեց` նկարները իրենը չեն, կնոջ օժիտն են, փոխանցվել են ժառանգաբար։
«Այվազովսկու փոքրիկ նկարը կոչվում է, եթե ճիշտ եմ հիշում, «Փոթորիկ»։ Առանձնապես արժեք չունի, այն մեծ Այվազովսկին չէ, փոքրիկ, մոտավորապես 25/30 չափերի նկար է»,– ասաց Հակոբյանը։
Վլադիմիր Վարդանյանն էլ արձագանքեց. «Վատ օժիտ չէ»։
Հիշեցնենք` արտահերթ ընտրություններին մասնակցելու համար ԿԸՀ ներկայացրած հայտարարագրում Հակոբյանը ներկայացրել էր Մարտիրոս Սարյանի երկու նկարներ` 18 և 150 հազար ԱՄՆ դոլար արժեքով և Հովհաննես Այվազովսկու 1 նկար` 200 000 ԱՄՆ դոլար արժեքով։
Բացի այդ հայտարարագրել էր նաև 1 բնակարան Իսպանիայում, 1 առանձնատուն Վահագնի թաղամասում, 2 բնակարան Երևանի Դեմիրճյան փողոցում, ավտոմեքենաներ, հողամասեր և 8 մլն դրամը գերազանցող մի քանի թանկարժեք գույք. 17 000 ԱՄՆ դոլար արժեքով Hublot ժամացույց, 11 մլն և 12 մլն ՀՀ դրամ արժողությամբ Vocheron Constonti և Breguet ժամացույցներ։
Ըստ հայտարարագրի, Զանգեզուրի պղնձմոլիբդենային կոմբինատում Հակոբյանի տարեկան աշխատավարձը կազմել է 72 մլն դրամ։