ԵՐԵՎԱՆ, 10 օգոստոսի – Sputnik. Եզդիների ազգային միության նախագահ Խդր Հաջոյանը հայտնել է «Իսլամական պետություն» ահաբեկչական խմբավորմանը միջազգային դատարանի առաջ կանգնեցնելու իր ժողովրդի մտադրության մասին։ Այս մասին նա հայտարարեց Երևանում կայացած մամուլի ասուլիսի ժամանակ։
Նրա խոսքով` եզդիները ցանկանում են հասնել նրան, որ նույնականացվեն և պատժվեն Իրաքում ցեղասպանություն գործած անձինք։ Բացի այդ, նրանք մտադիր են վերականգնել սեփական իրավունքները, որոնք ոտնահարվում են սկսած 2014 թվականից։
«Միջազգային հանրությունը պետք է գործողություններ ձեռնարկի, որոնք իրականում կկանխեն ցեղասպանությունները, այլ ոչ թե հերթական փաստաթուղթ կդառնան։ Եթե Հայոց ցեղասպանությունը դատապարտվեր, նոր ցեղասպանություններ չէին լինի», – նշեց Հաջոյանը։
Միության ղեկավարը հավելեց, որ ներկա պահին իրավաբանները զբաղվում են ապացույցներ հավաքելով, որոնք շուտով կներկայացվեն միջազգային դատարաններ։
«Բացի այդ, մենք աշխատանքներ կտանենք բոլոր այն երկրների և կազմակերպությունների հետ, որոնք չեն ճանաչել մեր ցեղասպանությունը և կպայքարենք, որպեսզի այն ճանաչվի, և մեզ աջակցեն բոլոր առնչություն ունեցող անձանց պատասխանատվության ենթարկելու հարցում»,– ասաց Հաջոյանը։
Նշենք, որ 2018 թվականին Հայաստանը ճանաչեց եզդիների ցեղասպանությունը։ 2014 թվականի օգոստոսին ԻՊ գրոհայիններին հաջողվեց գրավել Սինջար քաղաքը, որից հետո նրանք սկսեցին տեղացի եզդի ժողովրդի նկատմամբ զանգվածային ջարդեր իրականացնել։ Դրա հետևանքով որոշ տվյալներով` 50–ից 60 հազար եզդի ստիպված էին փախչել Շենգալի լեռներ։ ԻՊ գրոհայինները պաշարել էին սարերում նրանց ապաստանները։ Պաշարված մարդիկ սննդի ու ջրի պակաս ունեին։ ՄԱԿ–ի տվյալներով` շուրջ 2000 եզդի զոհվել է, վիրավորվել և գերեվարվել է 5-7 հազար մարդ։