ԵՐԵՎԱՆ, 10 օգոստոսի - Sputnik. «Հայաստան» դաշինքի կողմից ԱԺ տնտեսական հարցերի մշտական հանձնաժողովի նախագահի պաշտոնում առաջադրված պատգամավոր, Սյունիքի նախկին մարզպետ Վահե Հակոբյանն այսօր ԱԺ ամբիոնից հայտարարեց,ո ր ինքն ուղղաթիռ չի ունեցել։ Նա դա ասաց` ի պատասխան իրեն սպասարկող ուղղաթիռի մասին ՔՊ անդամ Անդրանիկ Քոչարյանի հարցին։
«Ես երբևիցե չեմ ունեցել ուղղաթիռ, դա Պաշտպանության բանակի ուղղաթիռն է եղել, որը մեր համագործակցության ընթացքում (թե` որ, չեմ կարող փակագծերը բացել) պայմանագրի շնորհիվ կատարում էր նաև մեկ–մեկ մեր խնդրանքը և մեզ տեղափոխում էր Կապանից Երևան»,– ասաց նա։
Վահե Հակոբյանը նաև զարմանք հայտնեց, որ քաղաքական մեծամասնությանը հետաքրքրում է մեկ ուղղաթիռի հարցը այն դեպքում, երբ իր մարզպետ եղած ժամանակ Սյունիքում կառուցվել է մի ամբողջ օդանավակայան։
«Թիվը հնչեցնե՞մ ինչքան է ծախսվել այդտեղ։ 9 մլրդ դրամ + ինքնաթիռ։ Այն արդեն պատրաստ է շահագործման, բայց ձեր պատճառով ինքը դարձել է հարակից սահման։ Հիմա որևէ մեկն իր վրա չի վերցնում պատասխանատվությունը, որ այդ ինքնաթիռը Կապանից թռնի Երևան և հակառակ ուղղությամբ, ուղևորներին տեղափոխի»,– ասաց Հակոբյանը։
Նշենք, որ տարիներ առաջ, Վահե Հակոբյանի` Սյունիքի մարզպետի պաշտոնում աշխատելու ընթացքում մամուլում լուրեր էին հայտնվել այն մասին, որ Հակոբյանը Երևանից Կապան և հակառակ ուղղություններով տեղափոխվում է ուղղաթիռով։
Մարզպետը պարզաբանել էր, որ ուղղաթիռն իր թռիչքներն իրականացրել է ԶՊՄԿ-ի պատվերով՝ կոմբինատի աշխատակիցներին տեղափոխելու համար, և, աշխատանքային գրաֆիկը համընկնելու դեպքում, ինքը ևս օգտվում է ուղղաթիռի՝ ՀՀ Սյունիքի մարզ և հակառակ ուղղությամբ չվերթերից։