Ելփինում կրակել են արջի վրա. կենդանաբույժները պայքարում են նրա կյանքի համար

Արջի մոտ առկա են ուղեղի ցնցման նշաններ, ինչը կարող է կապված լինել կրակոցի հետևանքով մոտակա ձորը գլորվելու հետ։
Sputnik
Վայոց Ձորի Ելփին գյուղում անօրինական որսի հերթական դեպքն է արձանագրվել. հայտնաբերվել է մոտ 3 տարեկան գորշ արջի էգ առանձնյակ՝  հրազենային վիրավորումով։
Վայրի բնության և մշակութային արժեքների պահպանության հիմնադրամից տեղեկացնում են, որ օգոստոսի 9-ին իրենց թիմը փրկարարական գործողություն է իրականացրել՝ վիրավոր կենդանուն տեղափոխելով Արարատի մարզում գտնվող Վայրի կենդանիների փրկարար կենտրոն։ Տեղում պարզվել է, որ կենդանին հրազենային վնասվածք է ստացել ծնոտի հատվածում։
Ահազանգ. կրկին Կարմիր գրքում գրանցված ծաղիկ է վաճառվում
«Հայտնաբերված գորշ արջի վիճակը ծանր է և նրա կյանքի համար արդեն երկու օր է պայքարում են FPWC մասնագետները, միջազգային գործընկեր կենդանաբույժները, ինչպես նաև՝ Երևանի կենդանաբանական այգու կենդանաբույժը։ 3-ամյա արջը երկար ժամանակ մնացել է ընկած վնասված վիճակում և առանց օգնության, ինչի պատճառով նրա վիճակն ավելի է ծանրացել։ Բացի այդ, կենդանին ենթարկվել է շատ ուժեղ սթրեսի և սկսել է կրծել սեփական թաթը»,- նշված է հաղորդագրության մեջ։
Այսօր էլ արջը շարունակում է մնալ կենտրոնում, վիճակը գնահատվում է ծանր, սակայն մասնագետները շարունակում են պայքարել նրա կյանքի համար։ Նախնական ախտորոշմամբ` կենդանու մոտ առկա են նաև ուղեղի ցնցման նշաններ։ Ըստ մասնագետների՝ դա կարող է կապված լինել կրակոցի հետևանքով մոտակա ձորը գլորվելու հավանականության հետ։
FPWC շնորհակալություն է հայտնում բոլոր գործընկերներին աջակցության համար։
Կյանքը վանդակում ու դրանից դուրս. բնապահպաններն Արմավիրում փրկել են հերթական արջին
Վայրի բնության և մշակութային արժեքների պահպանման հիմնադրամը դիմում է իրավապահ մարմիններին՝ պարզելու դեպքի մանրամասները և մեղավորներին հայտնաբերելու համար։
Նշենք, որ գորշ արջը ՀՀ կենդանիների կարմիր գրքում է գրանցված և ունի հատուկ պաշտպանության կարիք։