ԵՐԵՎԱՆ, 9 օգոստոսի – Sputnik. Մեծի Տանն Կիլիկիո կաթողիկոս Արամ Առաջինը շնորհավորական ուղերձ է հղել Նիկոլ Փաշինյանին ՀՀ վարչապետի պաշտոնում նշանակվելու կապակցությամբ։ Նրա ուղերձը հրապարակել է վարչապետի մամուլի ծառայությունը։
«Հայ ժողովրդի ու Հայաստանի պատմության վճռական շրջանում դուք վերստին ստանձնում եք վարչապետի ծանր ու պատասխանատու պաշտոնը: Պաշտոն, որ սովորական իմաստով դիրք ու պատիվ չէ, այլ իր էությամբ ու նպատակով հայրենակերտման առաքելություն։ Այսօր, ինչպես գիտեք, մեր հայրենիքը լուրջ տագնապներով է շրջապատված՝ թե՛ ներքին, թե՛ արտաքին: Պետականության հիմքերը վտանգված են: Հայաստանի ու Արցախի ժողովրդի կյանքում հուսախաբություն ու անորոշություն է տիրում: Հետևաբար ժողովուրդը սպասում է, որ դուք հայրենիքի վերականգնման ու վերածաղկման առաքելության լծվեք բարձրագույն աստիճանի նպատակասլաց պատասխանատվությամբ ու հանձնառությամբ»,– գրել է Արամ Ա–ն։
Նա Փաշինյանի ուշադրությունը հրավիրել է մի քանի խնդրի վրա, որոնք ներկայացրել է կետերով։
Կաթողիկոսի խոսքով` Ադրբեջանի ու Թուրքիայի միացյալ ուժերով Արցախի դեմ սանձազերծված պատերազմն ու դրա առաջացրած մարդկային մեծաթիվ զոհերը, մեր նահատակների արյունով ազատագրված հողերի գրավումը, հոգևոր կառույցների քանդումն ու հազարավոր ընտանիքների տեղահանումը խոր ընդվզում ու հուսահատություն են առաջացրել: Հնարավոր չէ մեր ժամանակակից պատմության այս դառն ու մռայլ էջը շրջել առանց հաշվետվության:
«Հարցեր կան, որոնք պատասխանի են սպասում: Անորոշություններ կան, որոնք հստակեցման կարիք ունեն: Փոխադարձ մեղադրանքներ են հնչում, որոնք լուսաբանման կարիք ունեն: Հետևաբար մենք սպասում ենք, որ նորընտիր Ազգային ժողովն իր օրակարգի առաջնահերթ հարցերից մեկը կդարձնի բոլոր խմբակցություններից բաղկացած հանձնաժողովի ստեղծումը, որպեսզի այն կարողանա պատերազմին առնչված բոլոր խնդիրները համապարփակ կերպով քննել և հրապարակային հաշվետվություն ներկայացնել մեր ժողովրդին»,– նշել է Արամ Ա–ն։
Նա շեշտել է, որ մեր ժողովրդի ներքին միասնականությունը, հատկապես ներկա տագնապալից ժամանակներում, անհետաձգելի հրամայական է:
«Անհրաժեշտ է, որ ընտրապայքարի օրերին ծավալած քաղաքական վատառողջ մշակույթն ու ներքաղաքական լարվածությունը տեղի տան իշխանություն-ընդդիմություն առողջ ու կառուցողական քննադատությանը: Սա է պահանջում հայրենիքի շահը»,– գրել է կաթողիկոսը:
Նա նշել է, որ հայրենիքին նկարագիր ու դիմագիծ տվողը ժողովուրդն է, և ժողովուրդն իր յուրահատուկ ինքնությունն արտահայտում ու պահում է բարոյական, հոգևոր ու ազգային արժեքներով:
«Հիմա, երբ համաշխարհային մշակույթի ապազգային «արժեքները» սկսել են թափանցել ամեն տեղ, մեր սպասումն է, որ Հայաստանի իշխանությունը, հատկապես կրթական ու մշակութային կառույցների ճանապարհով մեր ժողովրդին մղի ամրությամբ կառչելու մեր ազգի ինքնությունն ու հզորությունը երաշխավորող արժեքներին»,– ավելացրել է կաթողիկոսը:
Արամ Ա–ն առանձին կետով անդրադարձել է Արցախի թեմային` նշելով, որ վիրավոր Արցախի ցավը մեր ողջ ազգի ցավն է:
«Արցախի անկախության նկատմամբ մեր հավաքական հանձնառությունը պետք է ամուր պահել: Արցախի անկախության միջազգային ճանաչումը ո՛չ միայն Հայաստանի իշխանության առաջնահերթ հարցերից մեկը պիտի դառնա, այլ նաև սփյուռքի: Մեր ազգի հավաքական ներուժը պետք է ի սպաս դնել հանուն Արցախի անկախության ամրապնդման»,– նշել է նա:
Արամ Ա–ն կարևորել է նաև Հայաստան-սփյուռք գործակցությունը, որը կենսական կարևորություն ունի թե՛ Հայաստանի, թե՛ Արցախի և թե՛ սփյուռքի համար:
Նրա խոսքով` Արցախի պատերազմը և դրան հետևած Հայաստան-Ադրեջան-Ռուսաստան զինադադարի ստորագրությունը փաստորեն Կովկասում ստեղծված աշխարհաքաղաքական նոր իրավիճակի ցուցանիշ է:
«Ներկա վտանգավոր կացությունը պահանջում է, որ Հայաստանի անվտանգության ու հողային ամբողջականության նկատմամբ իշխանությունը լինի զգոն ու աննահանջ: Հայաստանի համար վտանգավոր զարգացումներով հղի շրջանով պայմանավորված ներկա իրավիճակը նաև «Ո՛չ» ասելու վճռականություն է պահանջում։ Պատմության ընթացքում մեծ կայսրությունների շահերի խաչմերուկում կռվախնձոր դարձած Հայաստանն իր գոյությունը պահեց, թեկուզ երբեմն վիրավոր, «Ո՛չ» ասելու իր հավաքական քաջությամբ»,–գրել է կաթողիկոսը:
Նրա խոսքով` այսօր, երբ Հայաստանը շրջապատված է հին ու նոր ժամանակների ցեղասպաններով, որոնք շարունակում են իրենց ծավալապաշտական նկրտումները Հայաստանի ու Արցախի նկատմամբ՝ անտեսելով իրենց հանձնառությունները ու միջազգային օրենքի տրամադրությունները, հայոց բանակը պետք է դառնա ավելի կազմակերպված ու մարտունակ:
«Նաև պետք է կարողանանք մեր ռազմավարական բարեկամների ու գործընկերների շարքը ընդլայնել: Մեր սպասումն է, պարոն վարչապետ, որ հաշվի առնեք մեր մտահոգությունների կարևորությունը, որպեսզի հնարավոր լինի հավաքական ու հետևողական ջանքերով, խոհեմ ու պատասխանատու ոգով մեր հայրենիքը առաջնորդել դեպի պայծառ ապագա»,– եզրափակել է Արամ Առաջինը:
Ուղերձի վերջում նշվում է, որ կաթողիկոսն աղոթում է Աստծուն, որպեսզի անսասան ու ապահով պահի Հայաստանի ու Արցախի Հանրապետությունները, իսկ վարչապետին իմաստություն ու կորով պարգևի:
Հիշեցնենք` Փաշինյանը կրկին ՀՀ վարչապետ նշանակվեց օգոստոսի 2-ին։