Այս և նախորդ գումարման խորհրդարանների միջև կա էական տարբերություն, որովհետև ի դեմս «Հայաստան» և «Պատիվ ունեմ» դաշինքների` Ազգային ժողովում կա նոր որակի ընդդիմություն։ Sputnik Արմենիայի հետ զրույցում նման կարծիք հայտնեց ԱԺ «Հայաստան» դաշինքի պատգամավոր Աղվան Վարդանյանը։
«Իշխանական կողմը վարքագծով ու մտածելակերպով չի փոխվել, իսկ մյուս կողմում փորձառու, հստակ դիրքորոշումներ ունեցող մարդիկ են։ Հետևաբար ԱԺ–ում սպասվում է շատ լուրջ աշխատանք, և շատ շուտով տեսանելի կլինի իշխանության ու ընդդիմության մտածողության և մակարդակների տարբերությունը»,– նշեց նա։
Վարդանյանի խոսքով` այս Ազգային ժողովը պարտավոր էր քաղաքական որոշմամբ ստեղծել Արցախի հարցերի հանձնաժողով։
«Առաջնահերթ խնդիրն այժմ նոր պարտվողական փաստաթղթերի ստորագրում թույլ չտալն է, իսկ վերջին պատերազմին առնչվող ամբողջ ճշմարտությունն անտարակույս բացահայտվելու է»,– ավելացրեց պատգամավորը։
Վարդանյանի հավաստմամբ` «Հայաստան» դաշինքը ձգտելու է խորհրդարանում ապահովել իրական ներկայություն և քայլ առ քայլ բացահայտել գործող իշխանության բոլոր սխալները, մեղքերն ու հանցագործությունները։ Ըստ նրա` թեև իշխող ուժը ձգտում է ամեն ինչ թաղել անցյալում, սակայն հիմա նախկինը իշխանությունն է, ընդդիմությունն է նոր, և առհասարակ սա, ըստ Վարդանյանի, անպտուղ պոլեմիկա է, որն արդեն իսկ հոգնեցրել է հասարակությանը։
Պատգամավորի գնահատմամբ` եթե փորձ է արվելու ընդդիմությանը հակադարձել անցյալի իրողություններով, խոսվելու է միայն 20-30 տարի առաջ տեղի ունեցած իրադարձությունների կամ իրականացված քայլերի, այլ ոչ թե մերօրյա իրողությունների ու հրատապ խնդիրների մասին, ապա նման մտածելակերպով ցանկացած քաղաքական ուժ ապագա չի ունենա։