ԵՐԵՎԱՆ, 17 հունիսի – Sputnik. Վճռաբեկ դատարանում կստեղծվի առանձին վարչական պալատ։ ՀՀ Դատական օրենսգրքում համապատասխան փոփոխությունը կառավարության այսօրվա նիստում ներկայացրեց Արդարադատության նախարարի առաջին տեղակալ Քրիստինե Գրիգորյանը` նշելով, որ փոփոխությունը բխում է դատական բարեփոխումների ծրագրից։
«Մասնագիտացված դատարանների ստեղծումը բխում է հասարակական կյանքի առանձին ոլորտներում առաջացող հարաբերությունների կապակցությամբ պատշաճ արդարադատություն իրականացնելու պահանջից: Դատավորները մասնագիտանում են որոշակի կատեգորիայի գործերով արդարադատության իրականացման մեջ, և այս դեպքում դատական սխալի հավանականությունն ավելի փոքր է»,– ասաց փոխնախարարը։
Նա նաև հայտնեց, որ մասնագիտացված Վճռաբեկ ու Գերագույն դատարանների կարգն այսօր գործում է աշխարհի գրեթե բոլոր զարգացած ու զարգացող երկրներում։
Վճռաբեկ դատարանների կազմում առանձին վարչական պալատներ են գործում Ռուսաստանի Դաշնությունում, Վրաստանի Հանրապետությունում, Լատվիայի Հանրապետությունում, իսկ Գերմանիայի Հանրապետությունում, Ավստրիայի Հանրապետությունում, Շվեդիայի Թագավորությունում, Լիտվայի Հանրապետությունում և մի շարք այլ երկրներում գործում են վարչական գործերով առանձին վճռաբեկ (գերագույն) դատարաններ:
«Օրենքն ԱԺ–ի կողմից ընդունվելուց հետո ստեղծվող նոր պալատի դատավորների համալրումը նախատեսում ենք իրականացնել 1-2 ամսվա ընթացքում»,– ասաց Գրիգորյանը։
Նախատեսվող ծախսը հաշվարկվել է տարեկան 34.9 մլն դրամ, որը կհատկացվի արդեն 2022թ–ի բյուջեով։
Հակակոռուպցիոն դատարաններ ստեղծելու առումով պարզապես անիմաստ փողեր են ծախսվում. Կոստանյան