ԵՐԵՎԱՆ, 23 մարտի – Sputnik. ՀՀ երկրորդ նախագահ Ռոբերտ Քոչարյանի և մյուսների գործով դատական նիստը, որն անցնում էր Երևանի ընդհանուր իրավասության դատարանում, կրկին հետաձգվեց։ Քոչարյանի փաստաբանները լքեցին դատարանի դահլիճը։
Քոչարյանի փաստաբան Արամ Վարդևանյանը նախ ինքնաբացարկ հայտնեց մեղադրող դատախազ Գևորգ Բաղդասարյանին։ Պաշտպանը նշեց, որ որոշ ժամանակ առաջ Բաղդասարյանը Ծաղկաձորում հանդիպել է «Իմ քայլը» պատգամավոր Վլադիմիր Վարդանյանի հետ (լուսանկարը տարածվել է համացանցում)։ Դատավորը հրաժարվեց քննել այդ միջնորդությունը։ Պաշտպանական կողմը կասկած հայտնեց, որ դատավորին նոր հրահանգ է իջեցվել։ Բաղդասարյանի և պաշտպանների միջև վիճաբանության ընթացքում դատախազը հայտարարեց․ «Գևորգ Բաղդասարյանը չի օգտագործվում, օգտագործում ա»։
Պաշտպանական կողմը նույնիսկ առաջարկեց հետաձգել այսօրվա նիստը մինչև ՍԴ-ի՝ 300․1 հոդվածի սահմանադրականության վերաբերյալ որոշման հրապարակումը։ Սակայն դատավոր Դանիբեկյանը թողեց դա առանց քննության։
Դատավոր Դանիբեկյանը նաև հետաձգեց պաշտպանության նախկին նախարար Սեյրան Օհանյանի պաշտպան Կարեն Մեժլումյանի՝ քրեական գործի վարույթը կասեցնելու միջնորդության լուծումը մինչև վճռաբեկ բողոքի լուծումը և Սահմանդրական դատարանում՝ առաջին ատյանի դատարանի դիմումի հիման վրա գործի քննության ավարտը։
Նիստի ընթացքում դատարանը նաև սանկցիա կիրառեց նախկին փոխվարչապետ Արմեն Գևորգյանի պաշտպան Էրիկ Ալեքսանյանի նկատմամբ, որը փետրվարի 23-ին չի կարողացել ներկայանալ նիստին, քանի որ այդ օրը մասնակցում էր Վերաքննիչ քրեական դատարանի մեկ այլ նիստի։
Դատավորը որոշեց այլևս չքննել որևէ միջնորդություն և անցնել մեղադրական ճառի եզրափակիչ մասի ընթերցմանն ու դատաքննության փուլին։ Ի նշան բողոքի՝ Ռոբերտ Քոչարյանի պաշտպանները լքեցին դատական նիստերի դահլիճը։
Դատավոր Աննա Դանիբեկյանը հայտարարեց, որ առանց նրանց անհնար է շարունակել նիստը։
Հաջորդ դատական նիստը կկայանա մարտի 30-ին՝ ժամը 13։00-ին։ Դատարանը կքննի փաստաբանների վարքագիծը։
Դատարանից դուրս գալուց հետո փաստաբանը Հայկ Ալումյանը լրագրողներին բացատրեց, թե ինչու են նման որոշում կայացրել։ Նրա խոսքով՝ դեռ որոշ ժամանակ առաջ մեղադրող կողմը դիմել էր դատարան՝ միջնորդելով, որ դատարանն արգելի փաստաբաններին միջնորդություններ ներկայացնել։ Դատախազները համարում են, որ պաշտպանական կողմի մշտական միջնորդությունները հետաձգում են դատաքննությունը։
«Դանիբեկյանը, ձևականորեն մերժելով փաստաբանների միջնորդությունը, ըստ էության արգելեց մեզ որևէ միջնորդություններով հանդես գալ», - ասաց Ալումյանը:
Հիշեցնենք, որ ՀՀ երկրորդ նախագահը մասնակցում է 2008 թվականի մարտի 1-ի դեպքերի վերաբերյալ քրեական գործի դատաքննությանը: Նրա դեմ քրեական հետապնդումը սկսվել է 2018-ին Հայաստանում տեղի ունեցած իշխանափոխությունից հետո։ Այդ ժամանակ էլ Ռոբերտ Քոչարյանը հայտարարել էր քաղաքականություն վերադառնալու մասին։ ՀՀ երկրորդ նախագահին երեք անգամ կալանավորել են։ Կալանավայրում նա ընդհանուր առմամբ 500 օր է անցկացրել։
2020 թվականի հունիսին Վերաքննիչ դատարանը նրան գրավի դիմաց ազատ արձակելու որոշում է կայացրել։
Քոչարյանը բազմիցս հայտարարել է, որ իր դեմ հարուցված քրեական գործն ամբողջությամբ շինծու է և ոչ այլ ինչ է, քան քաղաքական հետապնդում։
Քոչարյանը մասնակցել է «Հայաստան» հիմնադրամի նիստին. նա Փաշինյանի ասածին չի հավատում