ԵՐԵՎԱՆ, 15 փետրվարի – Sputnik. ՀՀ երրորդ նախագահ Սերժ Սարգսյանը «Արմնյուզ» հեռուստաընկերությանը տված հարցազրույցում վստահեցրել է, որ 2018 թվականին բանակցային գործընթացը չի եղել փակուղում։
«Նիկոլ Փաշինյանի ասածները խոսում են միայն ու միայն այն մասին, որ ինքը գրեթե 3 տարի աշխատելով որպես վարչապետ, լինելով գլխավոր բանակցող, այդպես էլ չի հասկացել բանակցությունների իմաստը։ Մենք երբեք չենք բանակցել այն մասին, թե ինչ ենք տալու, մենք մշտապես բանակցել ենք այն մասին, թե մենք ինչ ենք ստանալու։ Բայց բանակցությունները այս մարդկանց համար տալու կամ չտալու խնդիր էին։ Մեր ցանկացածը և մեր կարմիր գիծն այն էր, որ Լեռնային Ղարաբաղը երբեք չլիներ Ադրբեջանի կազմում, երբեք։ Դա էր մեր կարմիր գիծը, և մենք այդ գիծը պաշտպանել ենք մինչև 2018-ի ապրիլի 23-ը», - նշել է Սարգսյանը:
Նա հերքել է այն տեսակետը, թե հայկական կողմը բանավոր համաձայնել է 7 շրջանները զիջել Ապրիլյան պատերազմը կանգնեցնելու գնով:
Սերժ Սարգսյանն ու Սերգեյ Կոպիրկինը կրկին հանդիպել են
«Իրականության մեջ այդպիսի բան չի եղել։ Ապրիլյան պատերազմը կանգնեցվել է Ռուսաստանի միջնորդությամբ, որին դիմել է Ադրբեջանը, որովհետև ռազմական գործողությունների ընթացքում ստացել է ուժեղ հակահարված, և, կրելով մեծ կորուստներ, ստիպված է եղել նստել բանակցային սեղանի շուրջ», - ասել է Սարգսյանը:
Նրա խոսքով` հայկական կողմից ակնկալվում էր ստորագրել հրադադարի նոր համաձայնագիր, ինչի հետ Երևանը չի համաձայնվել։
«Երբ այս խելապակաս իշխանությունները հրաժարվեցին մեր ձեռքբերումներից և սկսեցին, այսպես ասած, Ալիևից տեղեկանալ բանակցային պատմության մասին, արդեն ինձ համար շատ հստակ հասկանալի էր, որ մենք գնում ենք դեպի պարտություն, որ մենք գնում ենք դեպի պատերազմ։ Ես ըմբռնումով եմ մոտենում սրանց այն ցանկությանը, որ իրենք փորձում էին ժամանակ շահել և միգուցե այդ ժամանակի ընթացքում հանգամանորեն ծանոթանալ, թե ինչի մասին էինք բանակցում և ուր էինք հասել, բայց այդ ժամանակը պետք էր շահել շատ պարզ, հասկանալի պատճառաբանությամբ և համանախագահներին բառացիորեն հետևյալն ասել՝ պարոնայք համանախագներ, այո, նախկին իշխանությունները գողեր էին, ավազակներ էին, թալանչիներ էին և այլն, և այլն, բայց, այնուհանդերձ, 2016-ին տեղի է ունեցել պատերազմ, և պատերազմի արդյունքով դուք ինքներդ ահա այսպիսի հայտարարություն եք ընդունել։ Խնդրում եմ՝ բերեք, իրականացնենք այս հայտարարությունը, այնուհետև անցնենք առարկայական բանակցությունների», - ասել է Սարգսյանը:
Նրա խոսքով` ներկայիս իշխանությունը անհասկանալի պայման դրեց համանախագահների առջև, թե Արցախը պետք է մասնակցի բանակցային գործընթացին։ Ըստ Սարգսյանի` դա նշանակում էր ոչ միայն բանակցային գործընթացի տապալում, այլև անհարգալից վերաբերմունք համանախագահող երկրների նկատմամբ, որոնք մեծ ջանքեր էին գործադրում խնդիրը լուծելու համար։
Ռոբերտ Քոչարյանը և Սերժ Սարգսյանը հանդիպել են Հայրենիքի փրկության շարժման ղեկավարների հետ