ԵՐԵՎԱՆ, 15 հունվարի – Sputnik. Պետական եկամուտների կոմիտեի աշխատակիցները զենք կրելու և օգտագործելու իրավունք կստանան։ Տեղեկությունը հայտնեց ՊԵԿ նախագահի տեղակալ Արշակ Գասպարյանը Ազգային ժողովի պաշտպանության և անվտանգության հարցերի մշտական հանձնաժողովի նիստին՝ ներկայացնելով «Զենքի մասին» օրենքում փոփոխությունների նախագիծը։
«Օրենքի մշակումը պայմանավորված է պետական եկամուտների կոմիտեի աշխատակիցներին մարտական զենք տրամադրելու անհրաժեշտությամբ», - ասաց Գասպարյանը:
Առաջին հերթին զենք կտրվի ՊԵԿ այն աշխատակիցներին, որոնք զբաղվում են մաքսանենգության դեմ պայքարով։
Գասպարյանը նշեց, որ կառավարության որոշմամբ որոշվելու է պաշտոնատար անձանց կոնկրետ ցուցակ և այն զինատեսակները, որոնք նրանք օգտագործելու իրավունք կունենան։ Նա ասաց, որ ՊԵԿ աշխատակիցներն արդեն դասընթացներ անցնում են` զենք կրելու համար։
Ինչպես խելքի բերել բանակն ու զինանոցը. սուղ միջոցներ, պահանջված զենք և չավարտված պատերազմ
Հիշեցնենք` այսօր նիստը նաև հավանություն տվեց վարորդների նկատմամբ տուգանային միավորների կիրառման հետաձգման մինչև 2022-ի հուլիսի 1-ը։