ԵՐԵՎԱՆ, 14 դեկտեմբերի - Sputnik. ՀՀ վարչապետ Նիկոլ Փաշինյանը հանձնարարել է, որպեսզի պետական լրատվությունն ավելի արագ արձագանքի առկա հարցերին ու տեղի ունեցող իրադարձություններին։ Այս մասին այսօր ուղիղ եթերում հայտարարեց ինքը` Նիկոլ Փաշինյանը։
«Կան իրավիճակներ, որոնք դեռ զարգացող են, ու դրանց վերաբերյալ պաշտոնական տեղեկատվությունը երբեմն հապաղում է մի պարզ պատճառով, քանի որ դեռ չկա իրադարձությունների արձանագրման կոնկրետ իրավիճակ, և այս պարագայում պաշտոնապես հաղորդված տեղեկությունները կարող են նեգատիվ ազդեցություն ունենալ»,– ասաց Փաշինյանը։
Վարչապետը կարևորեց, որ 21-րդ դարում հանրությունն ինքն էլ պետք է կարողանա զանազանել ստահոդ լուրերն իրականից։
«Օրինակ` բանը հասել է նրան, որ առանց ավելորդ բարդությունների լուրեր են դրվում շրջանառության մեջ, թե կառավարությունը Սևանը, Ջերմուկը կամ Սյունիքը զիջել է Ադրբեջանին։ Սա իսկապես տեղեկատվական պատերազմ է, և այստեղ մենք միջոցներ ենք ձեռնարկելու»,– հայտարարեց Փաշինյանը։
Նա նշեց նաև, որ պարբերաբար տեղեկություններ են շրջանառում նաև իր ընտանիքի անդամների, երեխաների մասին։ Օրինակ` նշվում է, թե նրանք լքել են Հայաստանը։
«Վերջին ամիսներին, առավել ևս պատերազմի օրերին, իմ ընտանիքի որևէ անդամ Հայաստանից դուրս չի եկել և չի պատրաստվում դուրս գալ», վստահեցրեց Փաշինյանը։
Նրա խոսքով` առանձին թեմա է դարձել նաև իր ընտանիքի` արտերկրում ունեցած կարողությունների մասին խոսակցությունը։
«Միակ անշարժ գույքը, որին Երկիր մոլորակի վրա տիրապետում է իմ ընտանիքը, Երևանի Շենգավիթ վարչական շրջանում գտնվող` բոլորիդ հայտնի բնակարանն է»,– հայտարարեց Փաշինյանը։
Երևանում շարունակում են պահանջել Փաշինյանի հրաժարականը. դեկտեմբերի 11–ը` լուսանկարներում
Ինչ վերաբերում է այլ ունեցվածքին, ապա, ըստ նրա, այն տեղավորվում է պաշտոնապես ներկայացրած հայտարարագրի շրջանակում։
Կեղծ լուրերի շարքում Փաշինյանն անդրադաձավ նաև իր հրաժարականի մասին պարբերաբար տարածվող լուրերին` հավելելով, որ իրեն տրված կարգավիճակից կհրաժարվի միայն «ժողովրդի կամարտահայտման հավաստի արդյունքների հիման վրա»։
«Քանի դեռ նման կամարտահայտություն տեղի չի ունեցել, շարունակելու եմ կատարել վարչապետի իմ գործառույթները, և դա պարտավորվել եմ անել շիտակ ու ազնիվ»,– ասաց Փաշինյանը։
Վարչապետի խոսքով` այսօր Հայաստանում տեղի են ունենում պրոցեսներ, որոնց նպատակը ՀՀ քաղաքացիներին քաղաքական գործընթացներից դուրս թողնելն է և կաբինետներում, բարձրաշխարհիկ միջավայրերում խնդիրներ լուծելը։
Փաշինյանը խոստացավ, որ ժողովուրդը մնալու է ՀՀ–ի տերը, և ինքը լինելու է այդ իրավունքի երաշխավորը։
Խամաճիկային իշխանություն են առաջարկում. Փաշինյանը խոսեց իր հրաժարականը պահանջողների մասին