ՀՀ Սննդի անվտանգության տեսչական մարմնի ղեկավարի տեղակալ Նարեկ Հայրապետյանը վստահեցնում է, որ Արցախից Հայաստան բերվող մանր և խոշոր կենդանիների շարժին հետևում են` անասնահամաճարակային իրավիճակի վերահսկման միջացառումներով։ Ինչ վերաբերում է պատերազմի օրերին վայրի բնության մեջ հայտնված «ամենակեր» խոզերին, ապա պատերազմական գործողությունների բուն տարածքներում հնարավոր չէ որևէ վերահսկողական գործողություն կատարելը։
«Սոցցանցերում պտտվում են տեսանյութեր` ինչպես են թե՛ ընտանի, թե՛ վայրի խոզերը հոշոտում դիակներ։ Իրականում խոզերը ամենակեր կենդանիներ են. այդտեղ ոչ մի զարմանալու բան չկա։ Ինչ վերաբերում է անասնահամաճարակային իրավիճակին` բնականաբար պատերազմական գործողությունների բուն տարածքներում հնարավոր չէ որևէ վերահսկողական գործողություններ կատարելը»,– բացատրում է տեսչական մարմի ղեկավարի տեղակալը։
Նարեկ Հայրապետյանի խոսքով` մինչ օրս, սակայն, չկան փաստեր, որ ռմբակոծությունների ու գոմերի ավերումների հետևանքով բաց տարածքներում մնացած ընտանի կամ վայրի խոզերը տեղաշարժվել են դեպի Հայաստան։ «Այդ խոզերը հիմնականում այն խոզերն են, որոնք ռմբակոծությունների հետևանքով, գոմերի ավերվածությունների հետևանքում մնացել են բաց տարածքներում և վարում են վայրի ապրելակերպ. դրանք ամենայն հավանականությամբ այդպես էլ կմնան վայրի։ Այդ խոզերի տեղաշարժ չի գրանցվել մինչև հիմա»,– մանրամասնում է ՍԱՏՄ-ի ղեկավարի տեղակալ։
Ինչ վերաբերում է մանր ու խոշոր կենդանիների տեղափոխմանը Արցախից Հայաստան, ապա Նարեկ Հայրապետյանը վստահեցնում է` տեղաշարժը վերահսկելի է.
«Մենք միջոցներ ենք ձեռնարկել, որպեսզի կենդանիների տեղափոխումը Արցախի տարածքից դեպի Հայաստան` սահմաններ և ավելի խորքեր, վերահսկելի լինի։ Սյունիքի մարզի անցակետերում, որոնք վերահսկվում են ուժային կառույցների կողմից, մենք միասին`ՍԱՏՄ–ն և Էկոնոմիկայի նախարարությունը, համագործակցում ենք բարձր մակարդակով. անցակետում գրանցվում են բոլոր կենդանիները, փաստաթղթավորվում են, և շարժի հետագծելիությունը ապահովելու համար տեղեկացնում ենք համապատասխան մարզին։ Ե՛վ Սյունիքի մարզում, և՛ վերջնակետում կատարվում են բոլոր համապատասխան միջոցառումները` պատվաստումներ, կենդանիների կարանտինացում և այլն, որպեսզի բացառենք որևէ հիվանդության ներթափանցում, հատկապես զոոնոզ հիվանդությունների մասին է խոսքը»,– ասում է ՍԱՏՄ ղեկավարի տեղակալը։
Նարեկ Հայրապետյանի խոսքով`վերահսկողությունը ամբողջական է ու հաջող, այն շարունակական կլինի։
Ադրբեջանցիների դիակները մնացել են դաշտերում, ձորերում ու ճահճուտներում