Մեծի Տանն Կիլիկիո կաթողիկոս Արամ Առաջինն այսօր շրջել է Բուրջ Համուդ հայկական թաղամասով, ծանոթացել պայթյունի հետևանքով ստեղծված ավերածություններին։ Կաթողիկոսը նաև մտել է հայկական ս. Գևորգ և ս. Հարություն եկեղեցիներ, որոնք նույնպես զգալիորեն տուժել են արհավիրքից։
Շատ շենք–շինություններ պետք է հիմքից վերականգնվեն, շատ բնակարաններ արդեն պիտանի չեն ապրելու համար։ Վերականգնողական աշխատանքների իրականացումը դժբախտաբար շատ դժվար է լինելու, որովհետև Լիբանանը մինչ պայթյունը գտնվում էր տնտեսական ճգնաժամի մեջ, նաև կար համավարակը` իր վատ հետևանքներով։
Հիշեցնենք` օգոստոսի 4-ին Բեյրութի նավահանգստի շրջանում հզոր պայթյուն է որոտացել ամոնիումի նիտրատի պատճառով։ Լիբանանի վարչապետ Հասան Դիաբը խոստովանել է, որ նյութը պատշաճ ձևով չի պահվել։ Լիբանանի նախագահ Միշել Աունը հրաժարվել է միջազգային հետաքննությունից։ Հայտնի է, որ Բեյրութի նավահանգստի ու մաքսատան աշխատակազմից մոտ քսան մարդ է հարցաքննվել, այդ թվում՝ ղեկավարները։
Պայթյունի զոհ է դարձել ընդհանուր առմամբ 154 մարդ, նրանից 25-ի ինքնությունը դեռ չի պարզվել։ Եվս 60-ը անհետ կորած են։ Տուժել է ավելի քան 5000 մարդ։
Եթե հայերը լքեն Բեյրութը, ուր կգնան, կամ պատրաստ է Հայաստանն ընդունել հայրենակիցներին
Բեյրութի հայկական թաղամասերը դժբախտաբար գտնվում այն էին նավահանգստին մոտ, որտեղ տեղի էր ունեցել պայթյունը։ Ինչպես արդեն տեղեկացրել ենք, պայթյունի հետևանքով մահացել է 13 հայ, վիրավորվել ավելի քան 250–ը, որոնց մեջ կան ծանր վիրավորներ։