ԵՐԵՎԱՆ, 16 հունիսի – Sputnik. ԱԺ–ն պատգամավորական անձեռնմխելիությունից զրկեց ԲՀԿ առաջնորդ Գագիկ Ծառուկյանին, սակայն նման դեպքերը Հայաստանում նոր չեն։
Sputnik Արմենիան առաջարկում է վերհիշել, թե երկրի տարբեր ղեկավարների օրոք Երրորդ հանրապետության գոյության ժամանակահատվածում որ պատգամավորներն են զրկվել անձեռնմխելիությունից։
Լևոն Տեր-Պետրոսյան
Պատգամավորական անձեռնմխելիությունից զրկելու առաջին դեպքը գրանցվել է 1996 թվականին Լևոն Տեր–Պետրոսյանի օրոք, ընտրություններում նրա հաղթանակից անմիջապես հետո։
Միանգամից 8 ընդդիմադիր պատգամավոր` Վազգեն Մանուկյանը, Արշակ Սադոյանը, Ներսես Զեյնալվանդյանը, Պարույր Հայրիկյանը, Դավիթ Վարդանյանը, Սեյրան Ավագյանը, Շավարշ Քոչարյանը, Ռուբեն Հակոբյանը, զրկվեցին անձեռնմխելիությունից։ Նրանց մեղադրում էին սեպտեմբերի 25-ին Երևանում տեղի ունեցած բախումների (ԱԺ–ն գրավելու փորձի) կազմակերպման մեջ։
Ռոբերտ Քոչարյան
1999 թվականի նոյեմբերի 10-ին խորհրդարանն անձեռնմխելիությունից զրկեց Մուշեղ Մովսիսյանին, որն անցնում էր «Հոկտեմբերի 27-ի» գործով։
2000 թվականի ապրիլի 4-ին պատգամավորական իմունիտետից զրկվեց ներքին գործերի նախարար Վանո Սիրադեղյանը։ Նրան մեղադրում էին Քրեական օրենսգրքի միանգամից մի քանի հոդվածներով, մասնավորապես, սպանությունների շարքի կազմակերպման համար։
Ի՞նչ փաստեր ներկայացրեց Դավթյանը Ծառուկյանին անձենմխելիությունից զրկելու համար. տեսանյութ
2006 թվականի հոկտեմբերի 13-ին պատգամավորական իմունիտետը կորցրեց ՀՀԿ պատգամավոր Հակոբ Հակոբյանը (Ճոյտ) «խուլիգանության» (զենքի կիրառման և ծեծկռտուքի) պատճառով։
Մարտի 4-ին Լևոն Տեր–Պետրոսյանի համախոհներ` ԱԺ պատգամավորներ Հակոբ (Վարդանեսի) Հակոբյանը, Մյասնիկ Մալխասյանը, Սասուն Միքայելյանը և Խաչատուր Սուքիասյանը պատգամավորական անձեռնմխելիությունից զրկվեցին նախագահական ընտրություններից հետո զանգվածային անկարգությունների կազմակերպման համար («7-ի գործ»)։
Սերժ Սարգսյան
2012 թվականի հոկտեմբերի 2-ին պատգամավորական իմունիտետը կորցրեց ԲՀԿ խմբակցության անդամ Վարդան Օսկանյանը։ Նա մեղադրվում էր իր ղեկավարած «Սիվիլիթաս» բարեգործական հիմնադրամի առանձնապես խոշոր չափի դրամական միջոցների յուրացման համար։
Նիկոլ Փաշինյան
2018 թվականի հունիսի 19-ին նույն ճակատագրին արժանացավ ՀՀԿ–ական պատգամավոր Մանվել Գրիգորյանը։ ՀՀ ԱԱԾ–ն նրան մեղադրում է ապօրինի զենք-զինամթերք պահելու և զինվորների պարենի յուրացման մեջ։ Քրեական գործ է հարուցվել ապօրինի յուրացման նպատակով առանձնապես խոշոր չափերի գույքի հափշտակման մեղադրանքով։
2020 թվականի հունիսի 16-ին անձեռնմխելիությունից զրկվեց ԲՀԿ նախագահ Գագիկ Ծառուկյանը։
Ազգային ժողովի մոտ լարված վիճակ է. բերման ենթարկվածների թվում ըմբիշ Ռոման Ամոյանն է
Ծառուկյանն անցնում է միանգամից երեք գործով։ Դրանցից մեկով խաղատների ոլորտում Ծառուկյանին պատկանող ընկերությունների ապօրինի գործունեության հետևանքով պետբյուջեին հասցվել է շուրջ 60 մլն դոլարի վնաս։ Երկրորդ գործը կապված է 2017 թվականի խորհրդարանական ընտրությունների ժամանակ ԲՀԿ–ի՝ ընտրակաշառք բաժանելու ենթադրյալ դեպքերի հետ։ ԱԱԾ վարկածով, խոսքը հարյուրավոր միլիոն դրամների մասին է։ Մեկ այլ գործով՝ Ծառուկյանի հետ առնչություն ունեցող ընկերությունը ապօրինի հողատարածք է յուրացրել։ Պետությանը 342 մլն դրամի վնաս է հասցվել: