ԵՐԵՎԱՆ, 8 հունիսի –Sputnik. Այսօր 2019 թվականի պետական բյուջեի կատարողականի քննարկման ժամանակ ՀՀ Ֆինանսների նախարար Ատոմ Ջանջուղազյանն ասաց, որ Հայաստանի իշխանությունն ուզում է չեղարկել նորակառույց բնակելի շենքերից բնակարան գնելու դեպքում եկամտային հարկի վերադարձի ծրագիրը:
Նախարարի խոսքով` հիփոթեքի տոկոսների մարման համար քաղաքացիներին եկամտային հարկի վերադարձի գործընթացը սկսել էր իրականացվել 2015 թվականից և ի սկզբանե դիտարկվում էր որպես հակաճգնաժամային միջոց, որը պետք է աջակցեր շինարարական ոլորտին։
Սակայն ավելի ուշ, ըստ նրա, պարզվեց, որ ծրագիրը համեմատաբար բարձր եկամուտ ունեցող խավի համար պետբյուջեի հաշվին էլ ավելի հարստանալու միջոց է դարձել:
«Դժվար է ասել, որ բնակարանային կարիքի համար է, քանի որ էլիտար բնակարան ձեռք բերելու համար պետական բյուջեից մեծ մասնակցություն չպիտի ենթադրվի: Դա ժամանակավոր միջացառում էր, քանի որ կառուցապատումը գնահատվում էր որպես շահութաբեր ոլորտ, և բյուջեի մասնակությունը կառուցապատման ոլորտին շատ ծանրակշիռ հիմնավորում պետք է ունենա», – նշեց Ջանջուղազյանը:
Այդ պատճառով էլ ավելացվեց սոցիալական բաղադրիչ և ավելացան սահմանափակումներ թե՛ ընդհանուր սահմանաչափի, թե՛ եկամտահարկի եռամսյակային գումարի վերաբերյալ։ Այս քայլերի վերջնական նպատակը տվյալ ծրագրից աստիճանաբար հրաժարվելն էր։
Նախարարը նշեց, որ շինարարությունը շահութաբեր ոլորտ է, և բացի այդ, այն ո՛չ արտահանման ոլորտ է, ո՛չ էլ արտադրական (որոնք կառավարության հայտարարած առաջնահերթությունների շարքում են):
«Հետևաբար, աստիճանաբար այս համակարգից հրաժարվելը մեր քաղաքականության ուղղությունն է: Շրջանառվում է նախագիծ, որը, կախված համատարած հայտարարագրման մեխանիզմից, կա՛մ կառաջարկենք խորհրդարանին, կա՛մ ոչ», – նշեց Ջանջուղազյանը։
Պետությունը հիփոթեքային 3 նոր ծրագիր կիրականացնի 2020թ–ից. Սմբատ Սաիյան
Նախագիծը ենթադրում է, որ Երևանի առաջին և երկրորդ գոտիների ծրագրի իրականացումը կդադարեցվի։ Նախատեսվում էր, որ ընդունվելու դեպքում այն ուժի մեջ կմտներ 2022 թվականի հունվարի 1-ից։
«Քանի որ այսօր մենք ստիպված ենք մոբիլիզացնել մեր հնարավորությունները, քանի որ չգիտենք, թե նման իրավիճակում որքան կապրենք, որոշվել է այն ավելի շուտ քննարկման դնել (մեկ տարի շուտ)», – նշեց Ջանջուղազյանը։
Նրա խոսքով` ռիսկեր կան, և չի բացառվում, որ համապատասխան որոշում կարող է կայացվել մինչև 2021 թվականի հունվարի 1-ը։
Միևնույն ժամանակ, նախարարը նշեց, որ եթե իշխանությունը համատարած հայտարարագրում մտցնելու ընթացքում գնա տոկոսների համար արվող ծախսերը հարկման բազայից նվազեցնելու ճանապարհով, իրենք ծրագիրն ամբողջությամբ կչեղարկեն։
Հիշեցնենք, որ մարտի 4-ին ԱԺ–ում հարցուպատասխանի ժամանակ ՀՀ վարչապետ Նիկոլ Փաշինյանը, պատասխանելով սոցիալական բնակարանների կառուցման մասին` ԲՀԿ պատգամավոր Սերգեյ Բագրատյանի հարցին, ասել էր, որ այդ հարցով կառավարությունում մի շարք քննարկումներ են եղել, սակայն դեռ որևէ որոշում չի կայացվել։
Քննարկվող հարցերից մեկը պետական բնակարանաշինության մասին պատգամավոր Հայկ Գևորգյանի առաջարկն է։
Փաշինյանի հայտարարած հիփոթեքային ծրագիրը դեռ չկա, բայց անուն արդեն ունի