ԵՐԵՎԱՆ, 7 հունիսի - Sputnik. Հայաստանում կորոնավիրուսով հիվանդների մեծ մասը կանայք են, բայց ավելի շատ տղամարդիկ են մահանում։ ՀՀ վարչապետ Նիկոլ Փաշինյանը Facebook-ի իր պաշտոնական էջում վիճակագրական երկու հետաքրքիր տվյալ է ներկայացրել։ Վարչապետի տեղեկություններով՝ կորոնավիրուսով վարակված կանայք, համենայն դեպս հաստատված դեպքերը, 34 տոկոսով ավելի են, քան տղամարդիկ։
«Բայց կորոնավիրուսից մահացածների 58 տոկոսը տղամարդիկ են, 42 տոկոսը՝ կանայք»,- գրել է Փաշինյանը։
Վարչապետի դիտարկումը մտահոգված, զայրացած, երբեմն էլ զավեշտալի մեկնաբանությունների պատճառ է դարձել։ Օգտատերերից մեկը գրել է.
«Կանայք մի բան գիտեն աչքիս, որ շատ են վարակվում ու քիչ մահանում։ Իրենք նույնիսկ խնձորը ուտելուց չվախեցան դրախտում։ Ինչ լինի՝ խեղճ տղամարդկանց գլխին է, արդար չի էլի մի ձև»։
«Ամեն ինչում տղամարդիկ տուժած են»,- գրել է մեկ ուրիշը։
Աշխարհում կորոնավիրուսով վարակվածների թիվը մոտեցել է 7 միլիոնին
Հիշեցնենք՝ Հայաստանում կորոնավիրուսով վարակվածների թիվը վերջին մեկ օրում ավելացել է 766–ով և դարձել 13 130։ Այս պահին փաստացի բուժում է ստանում 8844 մարդ, կատարվել է 69171 թեստավորում, առողջացել են վարակվածներից 4014–ը։ Ընդհանուր առմամբ գրանցվել է 200 մահվան դեպք։ Այսօր կորոնավիրուսից մահացել է տասը անձ, որոնցից վեցը տղամարդիկ են, չորսը՝ կանայք։