ԵՐԵՎԱՆ, 9 մայիսի — Sputnik. Հաղթանակներն են, որ նոր սխրանքների են կոչում սերունդներին: Նման կարծիք է հայտնել ՀՀ երրորդ նախագահ Սերժ Սարգսյանը` Հայրենական մեծ պատերազմում հաղթանակի 75-ամյակի, ինչպես նաև Շուշիի ազատագրման առթիով հղած իր ուղերձում։
«Շնորհավորում եմ մայիսյան մեր եռատոնի` Հայրենական մեծ պատերազմում հաղթանակի, Արցախի պաշտպանության բանակի կազմավորման և Շուշիի ազատագրման օրվա առթիվ: Առաջին հերթին ջերմորեն շնորհավորում եմ Մեծ հայրենականի վետերաններին, մաղթում ամուր առողջություն: Նրանց համար, անկասկած, մեծագույն երջանկություն էր Հայրենական մեծ պատերազմից տասնամյակներ հետո տեսնել հայրենիքի ազատության ու անկախության պայքարում իրենց զավակների և թոռների փառավոր հաղթանակը»,–ասել է Սարգսյանը։
Նրա խոսքով` հաղթանակից հետո աշխարհը, ցավոք, լիովին չձերբազատվեց չարից և մարդկությանը սպառնացող վտանգներից: Նեոֆաշիստները, նորօրյա ահաբեկիչները, զանազան հեղափոխական բռնապետերն ու զավթիչները մինչ այսօր չարիք են առաջադեմ մարդկության համար: Քսանմեկերորդ դարում անգամ ականատես ենք դառնում սարսափելի ավերածություններով պատերազմների, տեղահանությունների ու մարդկային տառապանքների: Սա, ըստ Սերժ Սարգսյանի, առաջադեմ մարդկությանը նետված հերթական մարտահրավերն է, որին համատեղ չդիմակայելը հղի է կործանարար հետևանքներով:
Մեր կոփված բարեկամությունը կշարունակվի. Պուտինն ու Միշուստինը շնորհավորել են Փաշինյանին
Անդրադառնալով Արցախյան ազատամարտին` Սարգսյանը հայտնել է, որն ավելի քան երեսուն տարի առաջ հայ ժողովուրդը հերոսաբար դիմագրավեց Արցախի դեմ ադրբեջանական ագրեսիային և հաղթանակով պսակեց զավթիչի դեմ իր ազատագրական պայքարը:
«Շնորհավորում եմ իմ զինակից ընկերներին` Արցախյան ազատամարտում հայրենասիրության և սխրանքի բացառիկ դրսևորումներով աչքի ընկած հերոսներին, որոնց հետ պատիվ եմ ունեցել անցնելու ամբողջ պատերազմը և ազատագրելու մեր հայրենիքի մի մասը` Արցախի սրբազան հողը»,–ասել է Սարգսյանը:
Հաղթանակած հին և նոր սերունդները միասին են. հուզիչ տեսանյութ` նվիրված Հաղթանակի 75–ամյակին
Նա շնորհավորել է նաև Ապրիլյան պատերազմին մասնակցածներին, նրանց, ովքեր չորս տարի առաջ հայ ժողովրդին պարտադրված հերթական պատերազմում գերազանցեցին իրենց պապերի ու հայրերի սխրանքը` փառավոր հաղթանակի նոր էջ գրելով հայոց պատմության մեջ: