ԵՐԵՎԱՆ, 7 ապրիլի– Sputnik. Հայաստանում կորոնավիրուսով վարակվածների թիվը մեկ օրում ավելացել է 20–ով և դարձել 853։ Տեղեկությունը Facebook սոցիալական ցանցի իր էջով ուղիղ եթերի ժամանակ ասաց ՀՀ վարչապետ Նիկոլ Փաշինյանը։
«Դուրս գրված պացիենտները նոր հայտնաբերված դեպքերից ավելի շատ են եղել` 25 առողջացում ունենք»,–ասաց վարչապետը։ Նրա խոսքով` առողջապահական համակարգը կամաց–կամաց դուրս է գալիս ցայտնոտից։
Փաշինյանը հայտնեց նաև, որ ծայրահեղ ծանր դեպքերի նվազում կա` 2 հոգի, որոնք ծայրահեղ ծանր էին, հիմա արդեն դուրս են եկել այս վիճակից։
Վարչապետը հիշեցրեց` կորոնավիրուսով վարակվածների բուժման համար 1400 մահճակալ է առանձնացվել, որոնց կեսն այժմ զբաղված է։
Նշենք, որ այս պահին կորոնավիրուսից փաստացի բուժվողների թիվը 758–ն է, արդեն բուժվել են 87–ը։ 4287 մարդու թեստ բացասական է եղել։ Ցավոք, ունեցել ենք 8 մահվան դեպք։
Ճգնաժամի հակառակ կողմը. ո՞ւմ է հարստացնելու կորոնավիրուսը
Հիշեցնենք, որ ապրիլի 6–ի տվյալներով դրական դինամիկա էր գրանցվել վիրուսի կանխարգելման հարցում։ Ինչպես երեկ իր Facebook-ի ուղիղ եթերի ընթացքում ասաց ՀՀ վարչապետ Նիկոլ Փաշինյանը ապրիլի 5-ին արված 263 թեստերից դրական է եղել ընդամենը 11-ը, այսինքն՝ միայն 11 մարդու մոտ է կորոնավիրուսը հաստատվել։ Նրա խոսքով` եթե այս դինամիկան պահպանվի, մեկ շաբաթից հնարավոր կլինի խոսել սահմանափակումները մեղմացնելու մասին։
Բնակչության կեսից ավելին պետք է հիվանդանա և իմունային պատնեշ ստեղծի. հոլանդական մոտեցում
Հիշեցնենք նաև, որ կորոնովիրուսի տարածման կանխարգելման համար Հայաստանում մարտի 16-ից ապրիլի 14–ն արտակարգ դրություն է սահմանվել։
Պարետ Տիգրան Ավինյանի որոշմամբ՝ մինչև ապրիլի 12-ը գործում են արտակարգ ռեժիմի խստացման պայմաններ. չի աշխատում հասարակական տրանսպորտը, 39 տարվա մեջ առաջին անգամ գործունեությունը դադարեցրել է Երևանի մետրոպոլիտենը: Քաղաքացիները տնից դուրս գալ կարող են միայն ծայրահեղ անհրաժեշտության դեպքում՝ իրենց հետ ունենալով անձը հաստատող փաստաթուղթ և հատուկ ձևաթուղթ: