ԵՐԵՎԱՆ, 3 ապրիլի – Sputnik. Մարտի 23-ից Իսրայելում ուսանող 9 ՀՀ քաղաքացիներ չեն կարողանում տուն վերադառնալ։ ՀՀ ԱԳՆ-ն պարզաբանում է տարածել։
«Ուսանողները տեղում ապահովվել էին կեցության համար անհրաժեշտ բոլոր պայմաններով, ինչպես նաև դեսպանության կողմից նրանց համար ձեռք էր բերվել դեպի Հայաստան ավիատոմս, ապահովվել տեղափոխումն օդանավակայան: Սակայն չվերթների չեղարկման և Իսրայելի կառավարության կողմից նոր տիպի կորոնավիրուսի դեմ պայքարի շրջանակներում կիրառվող սահմանափակումների պատճառով հետաձգվել է մեր քաղաքացիների` Հայաստան վերադարձի իրականացումը: Դեսպանությունը մշտական կապի մեջ է ուսանողների հետ, և պարբերաբար քայլեր են ձեռնարկվում տեղում իրենց առջև ծառացող բոլոր խնդիրներին լուծումներ գտնելու ուղղությամբ», - հաղորդել է ԱԳՆ խոսնակ Աննա Նաղդալյանը։
Կորոնավիրուսի համավարակի հետևանքով ավելի քան 50 երկրներում գտնվող ՀՀ քաղաքացիներ չեն կարողանում հայրենիք վերադառնալ։ Այնուամենայնիվ, ՀՀ դիվանագիտական ներկայացուցչությունները, արտաքին գործերի նախարարությունը և պարետատունը լիովին տիրապետում են նրանց խնդիրների մասին տեղեկությանը, փոխանցում է ԱԳՆ խոսնակ Աննա Նաղդալյանը։
Վարակվածներին կտանեն «Սուրբ Գրիգոր Լուսավորիչ». թաղամասի բնակիչներն առիթ ունե՞ն վախենալու
Ըստ նրա՝ յուրաքանչյուր առանձին երկրի դեպքում աջակցության ձևը և ծավալը որոշվում է՝ հաշվի առնելով առողջապահական անվտանգության խնդիրները, առկա հնարավորությունները և կոնկրետ իրավիճակը: Վերջում Նաղդալյանը խնդրել է չտրվել նման դեպքերի շուրջ աժիոտաժ ստեղծելու և այն հատվածական շահերին ծառայեցնելու գայթակղությանը:
Վրաստանի հետ բանակցությունների արդյունքում Հայաստան կվերադառնան 31 քաղաքացիներ
Նշենք, որ Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ։ Կազմակերպությունը պետությունների կոչ է արել միավորվել վարակի դեմ ակտիվ պայքարի համար։ ԱՀԿ–ի վերջին տվյալներով՝ աշխարհում կորոնավիրուսով ավելի քան 1 մլն մարդ է վարակվել։
Տասնյակ երկրներում կարանտին է հայտարարված, հարյուրավոր երկրներում չեն աշխատում ավիաընկերությունները։