ԵՐԵՎԱՆ, 12 մարտի — Sputnik. Գյումրեցի 43-ամյա Մարինե Խ–ին ու նրա 13– ամյա դստերը ծեծի ենթարկելու համար մեղադրվող 28-ամյա տղամարդն իրեն առաջադրված մեղադրանքը չի ընդունում եւ հրաժարվում է ցուցմունք տալ։
Տեղեկությունը Sputnik Արմենիային հայտնեց ՀՀ դատախազության հանրային կապերի բաժնի պետ Արևիկ Խաչատրյանը:
Նշենք, որ մինչ այդ նա հրաժարվել էր նաև արյան մեջ ալկոհոլի առկայության փորձաքննություն անցնել։
«Օրենքով նա այդ իրավունքն ունի»,– ասաց Խաչատրյանը` նշելով, որ ձերբակալվելուց հետո տղամարդը հրաժարվել է փորձաքննության համար արյուն հանձնել։
Հիշեցնենք` մարտի 5-ին, ժամը 15։40-ին Գյումրու Պռոշյան փողոցի տներից մեկում հայտնաբերվել էր 43-ամյա Մարինե Խ.-ի դիակը՝ բռնության հետքերով: Նույն տնից «տրավմային շոկ, գանգուղեղային փակ վնասվածքով» հիվանդանոց էր տեղափոխվել նրա 13-ամյա դուստրը` Նազելի Խաչատրյանը:
Վիրահատությունից հետո երեխային ծայրահեղ ծանր վիճակում տեղափոխել էին Երևանի «Սուրբ Աստվածամայր» ԲԿ, որտեղ հարազատներից ոչ ոք մինչ օրս տեսակցելու չի գնացել նրան։ Երեկ աղջիկը գիտակցության է եկել, որոշ բառեր արտաբերել։
Գյումրիում ծեծված 13-ամյա աղջիկն արդեն ինքնուրույն է շնչում. նրան այցելել է Փաշինյանը
Գյումրի քաղաքի խնամակալության և հոգաբարձության հանձնաժողովը արտահերթ նիստում որոշել է առանց ծնողական խնամքի մնացած երեխաներ ճանաչել ծեծի պատճառով հիվանդանոցում հայտնված 13-ամյա աղջկան` Նազելի Խաչատրյանին և նրա եղբորը: Նրանք կկարողանան ստանալ օրենքով սահմանված կենսաթոշակային գումար:
Մոր և աղջկա նկատմամբ բռնարարքի համար ձերբակալված տղամարդուն մեղադրանք է առաջադրվել ՀՀ ՔՕ 112-րդ հոդվածի (դիտավորությամբ առողջությանը ծանր վնաս պատճառելը) 2-րդ մասի 1-ին (երկու կամ ավելի անձանց նկատմամբ) և 14-րդ (անզգուշությամբ առաջացնելով տուժողի մահ) կետերով: