ԵՐԵՎԱՆ, 3 մարտի — Sputnik. Երևանի ընդհանուր իրավասության դատարանում ընթացող ՀՀ երկրորդ նախագահ Ռոբերտ Քոչարյանի գործով դատական նիստի ժամանակ մեղադրող կողմը հանդես է եկել փաստաբանների հերթական միջնորդության` նախագահող դատավոր Աննա Դանիբեկյանի բացարկի դեմ։
Ինչու են Ռոբերտ Քոչարյանի որդիներին կանչել ՀՔԾ
Դատախազ Պետրոս Պետրոսյանի խոսքով՝ նախորդ բոլոր բացարկի միջնորդությունների դեպքերում փաստաբանները խոսել են դատավորի կողմնակալության մասին՝ վկայակոչելով նրա կայացրած որոշումներն ու գործողությունները ՝ հիշեցնելով մամուլում տեղ գտած որոշ հրապարակումներ, այս կամ այն պաշտոնատար անձանց հայտարարություններ և այլն:
Այժմ, ըստ դատախազի, փաստաբանները մեջբերում են Բարձրագույն դատական խորհրդի ղեկավար Ռուբեն Վարդազարյանի վերջերս տված հարցազրույցը, սակայն կոնտեքստից կտրված են մեկնաբանվում դրանք: Վարդազարյանն ասել է. «Իշխանություններն ուզում են, որ բոլոր դատավորները նման լինեն Արմեն Դանիելյանին (Ռոբերտ Քոչարյանին կրկնակի կալանավորած) և Աննա Դանիբեկյանին»:
Այդ արտահայտություն է վկայակոչել Ռոբերտ Քոչարյանի փաստաբան Հայկ Ալումյանը` ներկայացնելով դատավոր Դանիբեկյանի բացարկի միջնորդությունը։
Մինչդեռ, ըստ դատախազի, պաշտպանական կողմը չարաշահում է այդ իրավունքը՝ ամեն անգամ ներկայացնելով միջնորդություններ և դրանով խոչընդոտելով գործի` ըստ էության քննությանը։ Դատախազը նշեց, որ անթույլատրելի է անվերջ ձգձգել գործընթացը, քանի որ դա հակասում է ողջամիտ ժամկետներում գործերի քննության սկզբունքին, հակասում է կողմերի, այդ թվում ՝ տուժող կողմի շահերին։
Պետրոսյանը դատարանին խնդրել է այդ միջնորդությունը թողնել առանց քննության։
Լսելով կողմերի միջնորդությունները` դատավոր Աննա Դանիբեկյանը հայտարարեց, որ դատարանը հեռանում է խորհրդակցական սենյակ։ Որոշումը կհրապարակվի մարտի 6–ին, ժամը 17։45։
Հիշեցնենք`ՀՀ 2–րդ նախագահ Ռոբերտ Քոչարյանին մեղադրանք է առաջադրվել 2008 թ.–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ.-ին Քոչարյանին երկու անգամ ձերբակալեցին: 2019 թվականի հունիսի վերջին նա ձերբակալվեց երրորդ անգամ:
Նույն գործով մեղադրանք է առաջադրվել նաև ՀԱՊԿ նախկին նախագահ Յուրի Խաչատուրովին, ՀՀ պաշտպանության նախկին նախարար Սեյրան Օհանյանին, ՀՀ նախկին փոխվարչապետ Արմեն Գևորգյանին։
ՀՀ նախկին վարչապետներն անձնական երաշխավորություն կներկայացնեն Ռոբերտ Քոչարյանի համար