ԵՐԵՎԱՆ, 3 մարտի — Sputnik. Երեկ երեկոյան դժբախտ դեպք է տեղի ունեցել Լոռու մարզում. Լուսաղբյուր գյուղի բնակիչ, 85–ամյա մի կին գնացքի տակ է ընկել։
Լուսաղբյուր համայնքի ղեկավարը` Արամայիս Հակոբյանը, Sputnik Արմենիայի հետ զրույցում պատմեց, որ կինը փորձել է ճանապարհը կարճացնել ու կամրջի փոխարեն գնացքի գծերով անցնել։
«Տարիքով կին է, չգիտեմ` ուր է գնալիս եղել, բայց գնացքի գծերով է անցել։ Չի տեսել, որ գնացքը գալիս է, գնացքն էլ հարվածել է նրան։ Գնացքավարը նկատել է կնոջը, արգելակել է, բայց արդեն ուշ է եղել»,–ասաց նա։
Խոսքը Վանաձոր-Գյումրի բեռնատար գնացքի մասին է, որը «կիսում» է Լուսաղբյուրը։ Ինչ վերաբերում է 85–ամյա կնոջը` տիկին Սեդային, ապա նա միայնակ թոշակառու է։
Ողբերգական վրաերթ Երևանում. հետիոտներից մեկը մահացել է, մյուսին տեղափոխել են հիվանդանոց
Սպիտակի ԲԿ–ի տնօրեն Վարդուհի Սիսակյանն էլ հայտնեց` կնոջ վիճակը ծայրահեղ ծանր է, քանի որ գլխի շրջանում լուրջ վնասվածքներ ունի։
«Կինն անգիտակից վիճակում է»,–ասաց նա։
Բժիշկները պայքարում են կնոջ կյանքը փրկելու համար։