ԵՐԵՎԱՆ, 1 մարտի— Sputnik.Sputnik Արմենիայի տեղեկություններով` Իրանից Հայաստան ժամանած ՀՀ քաղաքացիներին մեկուսացնում են հատուկ նախապատրաստված հյուրանոցում։
Հայաստանում կորոնավիրուսով վարակման առաջին դեպքն է հաստատվել։ Վարակը հայտնաբերվել է Թեհրանից օդանավով Երևան ժամանած 29 տարեկան տղամարդու մոտ։
«Մեկուսացնում են բոլոր նրանց, ովքեր մոտ են գտնվել կորոնավիրուսով վարակված տղամարդուն։ Իրանից ժամանածներին թույլատրել են վերցնել անհրաժեշտ իրերն ու հայտնել են, որ 14 օր նրանք մեկուսացված են մնալու` Ծաղկաձորում հատուկ այդ նպատակով նախապատրաստված հյուրանոցում»,–հայտնեց Sputnik Արմենիայի աղբյուրը։
Բացի այդ, թռիչքի ընթացքում օդանավում եղած բոլոր անդամների ընտանիքի անդամների ջերմությունն են ստուգում, զրուցում նրանց հետ` փորձելով հասկանալ` ինչ վիճակում են նրանք։
Իրանում ՀՀ դեսպանությունն աշխատում է արտակարգ ռեժիմով. նոր տեղեկություններ
Հիշեցնենք, որ կորոնավիրուսով վարակված տղան կնոջ հետ օդանավով ժամանել էր փետրվարի 28-ին։ Նա ինքն էր դիմել բժշկի, նրա վիճակը լավ է. հիվանդանոց դիմելիս ջերմել է, հիմա նույնիսկ ջերմություն չունի։
Նախնական թեստը դրական եղել, կրկնակի թեստի արդյունքները հայտնի են դարձել Երևանի ժամանակով այս գիշեր ժամը երեքին։ Հատկանշական է, որ պացիենտի կնոջ թեստի պատասխանը բացասական է։ Այսինքն՝ նրա մոտ վիրուս չի հայտնաբերվել։
Այժմ կառավարությունը Առողջապահության համաշխարհային կազմակերպության սահմանած կանոններով անհրաժեշտ միջոցառումներ կձեռնարկի։
Կորոնավիրուսը գրոհել է Իրանը. ի՞նչ է կատարվում հարևան երկրում
Իրանում ՀՀ դեսպանությունը երեկ հայտնել էր, որ փետրվարի 25-ից 28-ն ընկած ժամանակահատվածում օդանավով Հայաստան են տեղափոխվել ՀՀ 130 քաղաքացի և Հայաստանում օրինական կացության իրավունք ունեցող անձինք, իսկ ցամաքային սահմանով՝ 229: Ցամաքային սահմանով քաղաքացիների մուտքը Հայաստան ներկայումս շարունակվում է: