ԵՐԵՎԱՆ, 27 փետրվարի — Sputnik. Բանակում խաղաղ պայմաններում մահացած զինվորների մայրերը հույս ունեին, որ հեղափոխությունից հետո կհասնեն արդարության, բայց արդեն երկու տարի իրավիճակը չի փոխվում։ Այս մասին այսօր լրագրողների հետ զրույցում հայտարարեցին ՀՀ կառավարության շենքի դիմաց բողոքի ակցիա իրականացնող որդեկորույս մայրերը։
«Պատճառն անպատժելիությունն է։ Դատախազությունը, քննիչները վստահ են, որ իրենց որևէ պատասխանատվության չեն ենթարկելու»,– ասաց մայրերի պահանջին միացած իրավապաշտպան Նինա Կարապետյանցը։
Նրա համոզմամբ` այդ անպատժելիության մթնոլորտն առաջ է բերել հեղափոխության «թավիշը»։ Իրավապաշտպանը դրան է վերագրում նաև բանակում կատարված վերջին սպանություններն ու ինքնասպանությունները։
Խաղաղ պայմաններում զոհված զինծառայողների 5 քրեական գործ կվերաբացվի
«Ամբողջ աշխարհում տուժողի կողքին սարի նման կանգնած է պետությունն` ի դեմս դատախազության։ Մեր դեպքում ի շահ տուժողի արվող գործողությունները դատախազությունը բողոքարկում է»,– ասաց իրավապաշտպանը`ապօրինությունների ու կոռուպցիոն շղթայի հովանավորչության համար մեղադրելով նաև ՀՀ գլխավոր դատախազ Արթուր Դավթյանին։
«Այդ պաշտոնում մնալու միակ նպատակն այդ չբացահայտվող գործերը հովանավորելն է։ Ինքը փափուկ բարձ է դրել այս իշխանությունների գլխի տակ, խաչը համբուրելու պրոցեսն է երևի անցել, հավատարմություն է հայտնել։ Բայց, կտեսնեք` գալու է մի ժամանակ, որ Արթուր Դավթյանն ու նախկինից մնացած մի քանի պաշտոնյաներ «վանեցյան» են անելու»,– ասաց Կարապետյանցը։
Շուրջ 10 տարի առաջ բանակում մահացած Վալերիկ Մուրադյանի մայրը` Նանա Մուրադյանը ևս միացավ իրավապաշտպանի խոսքին` հավելելով. «Ես ամեն առավոտ որ աչքերս բացում ու նայում եմ իմ տղայի նկարին, ասում եմ` ես չկարողացա քեզ համար ոչ մի բան անել։ Իսկ եթե հանցագործը չի պատժվում, բանակում դեպքերը շարունակվում են։ Պարոն Փաշինյա՛ն, պատժե՛ք, որ այս սպանդը կանգնի»,– ասաց նա։
Հիշեցնենք` 2020թ.-ի հունվարի 1-ից փետրվարի 16-ն ընկած ժամանակահատվածում ՀՀ զինված ուժերում և ԱՀ պաշտպանության բանակում գրանցվել է մահվան 13 դեպք:
Բանակում մահվան դեպքերի պատճառը փո՞ղն է. Փաշինյանը վարկած ունի
Պաշտոնական տեղեկատվության համաձայն՝ մահացության դեպքերը եղել են հիվանդության կամ դժբախտ պատահարի հետևանքով, գրանցվել են նաև ինքնասպանությունների դեպքեր։
Այս իրավիճակի հանրային քննարումներից հետո ՀՀ և Արցախի ԶՈՒ–երում տեղի ունեցան մի շարք բարձրաստիճան զինվորականների պաշտոնանկություններ։