ԵՐԵՎԱՆ, 19 փետրվարի — Sputnik. ՊԵԿ–ը միակ պետական մարմինը չէ, որի աշխատակիցներին շռայլվող պարգևավճարները կարող են հետաքրքրել պետական ծախսերի արդյունավետությունն ուսումնասիրող Հաշվեքննիչ պալատի մասնագետներին։
ՀՀ Հաշվեքննիչ պալատի նախագահ Լևոն Յոլյանը Sputnik Արմենիայի հետ զրույցում չբացառեց, որ 2020թ.–ի ընթացքում նախատեսված հաշվեքննությունների շրջանակներում կուսումնասիրվեն նաև այլ պետական մարմինների պարգևավճարների չափերն ու դրանց արդյունավետությունը։
«Նայելու ենք և Սոցապ նախարարությունը, և՛ կենսաթոշակները, և՛ Պաշտպանության նախարարությունը, և այլ պետական մարմիններ։ Պարգևավճարները միանշանակ բոլորում չէ, որ նայելու ենք, բայց, իհարկե, կլինեն մարմիններ, որտեղ այդ թեման կմտնի հաշվեքննության մեջ»,–ասաց Յոլյանը։
Պարգևավճարներ վճարվել են, վճարվում են ու վճարվելու են. ՊԵԿ նախագահ
2020թ.–ի տարեկան գործունեության ծրագիրը, Պալատի նախագահի խոսքով, այս պահին նախապատրաստական փուլում է։ Հաշվեքննողներն ուսումնասիրում, գնահատում են ռիսկերը, հստակեցնում աշխատանքի վերջնական ծավալները։ Այդ ընթացքում կհստակեցվի նաև, թե որ պետական մարմինների պարգևավճարները կներառվեն հաշվեքննության մեջ։
Ինչ վերաբերում է ՊԵԿ–ի պարգևավճարներին, այս հարցն, ըստ Յոլյանի, արդեն որոշված է։ Հետաքննիչներն այս պահին արդեն աշխատում են այդ ուղղությամբ։
«Մենք 2020 թ–ի տարեկան ծրագրով ՊԵԿ–ում բավական մեծ, ծավալուն, ամբողջական նյութ ենք հաստատել, որի շրջանակներում հաշվեքննություն ենք իրականացնելու ընդհանուր ֆինանսական արդյունավետության վերաբերյալ։ Դրա մեջ ներառված է նաև պարգևատրումների հարցը»,–ասաց Յոլյանը։
Նշենք, որ Հաշվեքննիչ պալատի պաշտոնական կայքում հրապարակված տարեկան ծրագրի համաձայն` այս տարի Հյուսիս-հարավ ծրագրի մասով հաշվեքննության են ենթարկվելու Բարձր տեխնոլոգիական արդյունաբերության և Տարածքային կառավարման և ենթակառուցվածքների նախարարությունները։ ՏԿԵ նախարարությունում հաշվեքննություն կանցկացվի նաև Հայկական ատոմային էլեկտրակայանի և էներգախնայողության հիմնադրամի ֆինանսատնտեսական գործունեության մասով։
ՀՀ կրթության, գիտության, մշակույթի և սպորտի նախարարության հաշվեքննության հիմնական ուղղությունը լինելու է «Հայաստանի ազգային կինոկենտրոն» ՊՈԱԿ-ի ֆինանսատնտեսական գործունեությունը, Բնապահպանության նախարարության հաշվեքննության ուղղությունը` «Հայանտառ» ՊՈԱԿ-ը։
Ուսումնասիրվելու է նաև Քրեակատարողական ծառայության ու Դատական ակտերի հարկադիր կատարման ծառայության ֆինանսատնտեսական գործունեությունը, ինչպես նաև «Ռադիոիզոտոպների արտադրության կենտրոն» ՓԲԸ-ին շինարարության նպատակով պետական բյուջեից հատկացված միջոցների օգտագործումը։
«Այո, պարգևավճարներ լինելու են». Ջանջուղազյանը չգիտի` այս տարի՞ էլ հարցն աղմուկի կվերածվի
ծ2020թ.–ի ընթացքում հաշվեքննիչներն այցելելու են նաև Անշարժ գույքի կադաստրի կոմիտե, Սյունիքի մարզպետարան ու Գյումրու քաղաքապետարան։
Հիշեցնենք, որ այսօր` փետրվարի 19-ին, ՀՀ Հաշվեքննիչ պալատի գլխավոր մասնագետ Դավիթ Չիբուխչյանն ԱԺ–ում հայտնել էր, որ Հաշվեքննիչ պալատն ուսումնասիրում է ՊԵԿ-ի պարգևավճարները։ Թե որքանով է արդարացված ՊԵԿ աշխատակիցների պարգևավճարների չափը, և արդյոք նրանք պարգևատրվո՞ւմ են ըստ իրենց կատարած աշխատանքի, Չիբուխչյանի խոսքով, պարզ կլինի միայն հաշվեքննության ավարտին։ ՀՊ ներկայացուցիչը վստահեցրեց, որ դրանք կներկայացվեն հանրությանը։
Մարությանը վստահ է, որ լավ աշխատողը պետք է լավ եկամուտ ունենա. ովքե՞ր են պարգևավճար ստացել