ԵՐԵՎԱՆ, 8 հունվարի — Sputnik. Հունվարի 6-ին ՀՀ ՊՆ զորամասերից մեկի պահպանության տեղամասի մարտական դիրքում մահացած պայմանագրային զինծառայող Գեղամ Խաչատրյանն ամուսնացած էր և 10 տարեկան տղա ուներ։ Sputnik Արմենիային այս մասին հայտնեց Տավուշի մարզի Բերդ համայնքի ղեկավար Հարություն Մանուչարյանը։
Ավելի վաղ հայտնել էինք, որ հունվարի 6-ին, ժամը 15:00-ի սահմանում ՀՀ ՊՆ զորամասերից մեկի պահպանության տեղամասի մարտական դիրքում մահացել է պայմանագրային զինծառայող Գեղամ Խաչատրյանը։ Քննչական կոմիտեն հաղորդել էր, որ զինվորն ինքն է իրեն գնդացրից մահացու հրազենային վիրավորում հասցրել:
«Գեղամը Բերդում էր ապրում, վարձակալությամբ։ Նորաշենում հայրական տուն ուներ, սակայն մեզ մոտ էր ապրում գուցե այն պատճառով, որ աշխատանքի գնալ–գալն ավելի մոտ լինի»,–ասաց Մանուչարյանը։
Նա հայտնեց նաև, որ Գեղամ Խաչատրյանը 32 տարեկան էր և վերջին տարիներին էր պայմանագրային զինծառայող դարձել։ Մինչ այդ, ըստ Մանուչարյանի, Գեղամ Խաչատրյանն ընտանիքի հետ Ռուսաստանում է բնակվել։
Արցախի զորամասերից մեկում հիվանդության հետևանքով զինծառայող է մահացել
Վաղը տեղի կունենա մահացած զինծառայողի հոգեհանգստի արարողությունը։
Հիշեցնենք` Քննչական կոմիտեի զինվորական քննչական գլխավոր վարչությունում հարուցվել է քրեական գործ` Քրեական օրենսգրքի 110-րդ հոդվածի 1-ին մասի հատկանիշներով (ինքնասպանության հասցնելը):
Կատարվում է նախաքննություն: