Մանվել Մարգարյան, Sputnik
Մարգար Աղաջանյանը մարզչի կարգավիճակով մասնակցել է աշխարհի 2014 և 2018թթ. առաջնությունների եզրափակիչ փուլին: Ծնվել է 1965 թվականին Թեհրանում: Ֆուտբոլով սկսել է զբաղվել Իրանի մայրաքաղաքի «Արարատ» ակումբում՝ խաղալով նախ երիտասարդական, այնուհետև` գլխավոր թիմում: Մեկ տարի հանդես է եկել «Էսթեղլալում», որից հետո վերադարձել և իր կարիերայի մեծ մասն անցկացրել է «Արարատ» ակումբի կազմում: Հանդես է եկել նաև «Պաս», «Բահման», «Բանկ Թեջարաթ», «Շահաբ Զանիան» ակումբներում: Միանալով «Պաս» ակումբին՝ հենց առաջին մրցաշրջանում հաղթել է Իրանի լիգայում:
2005թ.-ին Մարգար Աղաջանյանը ստացել է մարզչական վկայական ու սկսել մարզչի կարիերան: Աշխատել է «Օղաբ» ակումբում և՛ որպես մարզչի օգնական, և՛ որպես գլխավոր մարզիչ: Ընդհանուր առմամբ մարզել է «Հոմա», «Դամաշ Գիլան», «Դամաշ Լորեսթան» և «Դամաշ Թեհրան» ակումբները: Հուման Աֆազելիի հեռանալուց հետո Աղաջանյանը նշանակվեց «Ազադեղան» լիգայի «Դամաշ Լորեսթանի» ղեկավար: Հատկանշական է այն հանգամանքը, որ Գիլանի «Դամաշը» գլխավորելու ժամանակ թիմում հանդես էր գալիս Հայաստանի հավաքականի նախկին ֆուտբոլիստ Համլետ Մխիթարյանը:
Աղաջանյանի մարզչական ունակությունները գնահատվել է նաև Իրանի ֆուտբոլի ֆեդերացիան: 2006 թվականի Աշխարհի առաջնությունից հետո 1.5 տարի եղել է հավաքականի վերլուծաբանը: 2009 թվականին մինչև 19 տարեկանների Իրանի հավաքականի գլխավոր մարզչի օգնականն էր:
Աղաջանյանի կյանքում շրջադարձային եղավ հանդիպումը Իրանի ազգային հավաքականի գլխավոր մարզիչ, պորտուգալացի հայտնի մասնագետ Կարլուշ Կեյրոշի հետ, երբ վերջինս Աղաջանյանին կարճատև զրույցից հետո առաջարկեց երկրորդ մարզչի կարգավիճակով հավաքականում անցնել աշխատանքի: Աղաջանյանն Իրանի ազգային ընտրանու երկրորդ մարզչի կարգավիճակով մասնակցեց բրազիլական և ռուսական ստուգատեսներին:
Հնարավորության դեպքում մեր հայրենակիցն ուշադրությամբ հետևում է նաև Հայաստանի ազգային հավաքականի մրցելույթներին և կարծում է, որ մեծ աջակցության դեպքում մեր ընտրանին կհասնի զգալի հաջողությունների, որովհետև ունի մեծ ներուժ: Այդուհանդերձ Աղաջանյանի նպատակը Իրանի ազգային թիմի գլխավոր մարզչի պաշտոնում աշխատելն է: Իրանական «Խաբար Վարզեշի» թերթին տված հարցազրույցի ընթացքում Աղաջանյանը նշել է. «Ամեն օր ինչ-որ նոր բան եմ սովորում և իմ մեջ տեսնում եմ այն, որ կարող եմ մի օր գլխավորել Իրանի հավաքականը: Միգուցե երկու տարի առաջ նման բան չէի մտածում, սակայն հիմա մեծ փորձ եմ ձեռք բերել»:
Մարգար Աղաջանյանն անշուշտ դասվում է հեռանկարային մարզիչների շարքը, որոնք տքնաջան աշխատանքի շնորհիվ իրենց արժանի տեղն են գտնում ֆուտբոլային ասպարեզում՝ արժանանալով դրվատանքի ու մեծարման: