Արձակագիր Հրանտ Մաթևոսյանի որդին` «Հրանտ Մաթևոսյան» հիմնադրամի տնօրեն Դավիթ Մաթևոսյանը, դիմել է ՀՀ վարչապետ Նիկոլ Փաշինյանին «Հրանտ Մաթևոսյան» մշակութային կենտրոն-թանգարանի` կիսատ մնացած շինարարության հարցով։ Բանն այն է, որ «թավշյա հեղափոխությունից» հետո ընդհատվել է «Հրանտ Մաթևոսյան» մշակութային կենտրոն-թանգարանի կառուցումը, որը սկսվել էր նախորդ իշխանության ժամանակ` 2017թ.-ին։
Հրանտ Մաթևոսյանի ժառանգությունը պետք է Հայաստանի այցեքարտը դառնա
Ըստ Դավիթ Մաթևոսյանի՝ կենտրոնն առ այսօր չի կառուցվել ու չի գործում այն պատճառով, որ պետական լիազոր մարմնում՝ կառավարությունում, այն պարզ ընկալումը չունեն, որ դրանով իրենք պետք է զբաղվեն։ Դավիթ Մաթևոսյանն ասաց, որ Հրանտ Մաթևոսյանի անվան կենտրոն-թանգարանի հարցը լակմուս է ներկայիս իշխանության համար։
«Մենք խոսում ենք կենտրոն-թանգարանի մասին, մենք չենք խոսում տուն-թանգարանի մասին։ Մենք ուզում ենք մեր գաղափարով ստեղծել մաթևոսյանական միջավայր»,–Sputnik Արմենիայի հետ զրույցում ասաց արձակագրի որդին` հավելելով, որ այն ոչ միայն Մաթևոսյանի գրականության կենտրոնն է լինելու, այլ օգնելու է մատաղ սերնդին աշխարհը տեսնել Մաթևոսյանի պրիզմայով։
Գաղափարի հեղինակները նպատակ են ունեցել հիմնել ոչ թե մեծ արձակագրի տուն-թանգարանը, այլ միջավայր, որտեղ ամեն ինչ կշնչի Մաթևոսյանով։
Բլից հարցեր Փաշինյանին. վարչապետը պատմել է սիրած գրողների և ուտելիքի մասին
«Հրանտ Մաթևոսյան» մշակութային կենտրոն-թանգարանը, ըստ հիմնադիրների, շրջապատված է լինելու այգով, որը կրելու է Հրանտ Մաթևոսյանի ծննդավայրի` Ահնիձորի անունը։ Այնտեղ իր հերթին լինելու է Նանա իշխանուհու անունով կամրջակ, նախատեսվում է կյանքի կոչել նաև լաբիրինթոսի գաղափարը, որը խորհրդանշելու է Մաթևոսյան գրողի անցած ճանապարհը։