ԵՐԵՎԱՆ, 22 նոյեմբերի — Sputnik, Արմենուհի Մխոյան. Պարզվում է` Գյումրիում քաղաքակիրթ եղանակով շների վնասազերծում իրականացնող ընկերություն կամ շահագրգիռ անձիք չկան: Հայտարարված մրցույթին ոչ մի հայտ չի ներկայացվել:
Գյումրու քաղաքապետարանը հայտարարել է մրցույթ՝ թափառող կենդանիների վնասազերծման (ստերջացում) ծառայությունների իրականացման համար: Աշխատանքներն իրականացնող կառույցի առաջին մրցույթի վերջնաժամկետ սահմանվել է նոյեմբերի 21-ը: Sputnik Արմենիային հետ զրույցում Գյումրու փոխքաղաքապետ Հայկ Սուլթանյանն ասաց, որ մրցույթի մասին տեղեկությունը տարածվել է ինչպես հարկն է, բայց հայտարարված մրցույթին ոչ մի հայտ չի եղել: Քաղաքապետարանն անմիջապես նոր մրցույթ է հայտարարել՝ այս անգամ հայտերի ընդունման վերջնաժամկետ սահմանելով նոյեմբերի 29-ը:
«Պետք է վերջ տալ սպանություններին». ակտիվիստները պահանջում են պաշտպանել կենդանիներին
Ավելին` մինչ մրցույթի մասին տեղեկատվության տարածումը ավագանու խմբակցությունների ներկայացուցիչների մասնակցությամբ Գյումրու փոխքաղաքապետ Հայկ Սուլթանյանի մոտ կազմակերպված հանդիպման ընթացքում մշակվել ու ներկայացվել է 2 տարբերակ։
«Ստեղծել առանձին ՀՈԱԿ, որը կզբաղվի շների վնասազերծմամբ (բռնում, բուժում, ստերջացում և բաց թողնում) և հայտարարել մրցույթ, որի արդյունքում հաղթող ճանաչված կազմակերպությունը կիրականացնի այդ գործընթացը»,-տեղեկացրեց Հայկ Սուլթանյանը:
Շինշիլայի շուքը. ԵԱՏՄ–ն օգնել է, որ հայերը մուշտակ կարելով փող աշխատեն
Նրա խոսքով` խնդիրն անչափ կարևոր ու հրատապ է: Քաղաքապետարանը, այսպես ասած, «նալի ու մեխի արանքում է», մի կողմից` օրինագիծը, մյուս կողմից` բնակիչների բողոքները:
«Առավոտյան թոռնիկիս ստիպված ես եմ ուղեկցում դպրոց, վերջին օրերին շները շատացել են, հատկապես աղբամանների մոտից հնարավոր չէ անցնել, շատ կան նաև կատաղած շներ: Առաջ գալիս կրակում էին, հիմա` չէ»,-Sputnik Արմենիային բողոքեց տիկին Զվարթը:
Գյումրու քաղաքապետարանի բնակկոմունալ տնտեսության և շրջակա միջավայրի պահպանության բաժինը թափառող շների վնասազերծումն այս պահին իրականացնում է միայն եզակի դեպքերում՝ կատաղած շների վերաբերյալ բնակիչների ու կազմակերպությունների դիմում-բողոքները հաշվի առնելով:
«Այս ընթացքում, ինչ գործընթացը դադարեցվել է, շատ նամակներ ենք ստանում, հատկապես` կատաղած շների մասին, որոնք մեծ վտանգ են ներկայացնում: Որևէ գործողություն չի իրականացվել»,-ասաց համայնքի ղեկավարի մամուլի քարտուղար Սոնա Առաքելյանը:
Հավելենք, որ մինչ այս Գյումրիում թափառող շների վնասազերծմամբ զբաղվել է «Զբոսայգիներ և պուրակներ» ՊՈԱԿ-ը: Կատաղած շների վնասազերծում իրականացվել է բնակիչների դիմում-բողոքների հիման վրա: 2019 թվականի համար քաղաքային բյուջեով նախատեսվել է մոտ 4 մլն 200.000 դրամ (մոտ 1800 շան վնասազերծման համար): Վերջին ամիսներին գումար չի փոխանցվել, բողոքներից և օրինագծից հետո ՊՈԱԿ-ի գործունեությունը դադարեցվել է:
Խստորեն դատապարտում ենք արջի և քոթոթների նկատմամբ դաժան վերաբերմունքը. հայտարարություն