ԵՐԵՎԱՆ, 14 նոյեմբերի – Sputnik. Վազգեն Մանուկյանի գործընկերները համաձայն չեն իշխանության այն տեսակետի հետ, թե Մանուկյանը չէր պահպանում քաղաքական չեզոքությունը: Այս մասին գրում է «Ժողովուրդ» օրաթերթը։
«Հանրային խորհրդի նախագահ Վազգեն Մանուկյանի հրաժարականից հետո խորհրդի նրա գործընկերները «Ժողովուրդ» օրաթերթի հետ զրույցում չեն համաձայնել իշխող թիմում առկա այն տեսակետի հետ, թե Մանուկյանը չէր պահպանում քաղաքական չեզոքությունը: ՀԽ անդամ Կարինե Դանիելյանը «Ժողովուրդ» օրաթերթին ասել է. «Ես նաև նախորդ ՀԽ-ում եմ եղել, և մենք անընդհատ հանդիպել ենք և՛ նախարարների հետ, և՛ վարչապետի, և՛ նախագահի հետ»,- գրում է թերթը:
Մանուկյանն, ի դեպ, ավելի վաղ հայտարարել էր, թե հրաժարական կտա, եթե Նիկոլ Փաշինյանն իրեն ասի, որ չի ուզում աշխատել իր հետ: «Ժողովուրդ» օրաթերթը վարչապետի մամուլի խոսնակից փորձել է պարզել` արդյո՞ք վարչապետը խոսել է այդ մասին, Վլադիմիր Կարապետյանը պատասխանել է` վարչապետի և Մանուկյանի միջև հանդիպում, զրույց չի եղել։
Ի դեպ, ըստ շրջանառվող տեղեկությունների` ՀԽ նոր նախագահի հավանական թեկնածուներից է քաղաքագետ Ստյոպա Սաֆարյանը:
Ինչն է նորություն Սարհատ Պետրոսյանի դիմումի մեջ Ավինյանի համար
Նշենք, որ Մանուկյանի փեսան Կադաստրի կոմիտեի ղեկավարի պաշտոնից վերջերս ազատվելու դիմում գրած Սահրատ Պետրոսյանն է»:
Հիշեցնենք` Հանրային խորհրդի նախագահ Վազգեն Մանուկյանը նոյեմբերի 13-ին հրաժարական տվեց։ Իր հրաժարականի նամակում նա նշել էր, որ մեր երկրում ձևավորվել է ատելության աննախադեպ մթնոլորտ և այդ պայմաններում իր հետագա գործունեությունը Հանրային խորհրդում համարում է աննպատակահարմար։
Նշենք, որ Վազգեն Մանուկյանը 1988 թ. փետրվարից «Ղարաբաղ» կոմիտեի անդամ էր: Եղել է ԱԺՄ վարչության առաջին նախագահը, Հայաստանի երկրորդ հանրապետության առաջին վարչապետը: 1991 թ. սեպտեմբերի 26-ին Վազգեն Մանուկյանը հրաժարական է տվել վարչապետի պաշտոնից: 1991 թ. շարժման ակտիվ մասնակիցների և համախոհների հետ նախաձեռնել է ԱԺՄ կուսակցության հիմնադրումը:
1992 թ. սեպտեմբերին Մանուկյանը նշանակվել է ՀՀ պետնախարարի, այսուհետև պաշտպանության նախարարի պաշտոնակատար` միաժամանակ ղեկավարելով ՀՀ արդյունաբերական համալիրը: 1993 թ. օգոստոսին ազատվել է պաշտոնից: 1990-2007 թթ. Վազգեն Մանուկյանը եղել է ՀՀ ԱԺ պատգամավոր, Ազգային ժողովրդավարական միություն (ԱԺՄ) կուսակցության նախագահ, 2009 թ. մարտից ՀՀ Հանրային խորհրդի նախագահն էր:
Սարհատ Պետրոսյանը հրաժարականի դիմում էր ներկայացրել հոկտեմբերի 18-ին։ Հայտարարության մեջ նա ներկայացրել էր ամբողջ եղելությունը և նշել, որ այն ունի միայն մասնագիտական պատճառներ՝ տարվող ոլորտային քաղաքականությամբ պայմանավորված, և ոչ ոք թող չփորձի այնտեղ ինչ-ինչ քաղաքական նկատառումներ կամ ընտանեկան-ազգակցական կապերով պայմանավորված պատճառներ փնտրել։