ՄԱԿ–ի բնակչության հիմնադրամի Հայաստանյան գրասենյակի հաղորդակցության պատասխանատու Մհեր Մանուկյանը Sputnik Արմենիայի հետ զրույցում խոսում է աղջիկ երեխաների միջազգային օրվա, ինչպես նաև սեռով պայմանավորված` հղիության արհեստական ընդհատումների մասին։
«Հայաստանում աղջիկ երեխաների հիմնական խնդիրը սեռով պայմանավորված հղիության արհեստական ընդհատումներն են. մեր հասարակությունը ինչ–ինչ պատճառներով թերարժևորում է աղջիկներին, ինչի դրսևորումը տեսնում ենք նաև հղիության արհեստական ընդհատմամբ»,–Sputnik Արմենիային ասել է Մհեր Մանուկյանը։
Մանուկյանի խոսքով`պատճառը, բուն խնդիրն այն է, որ մեր հասարակության մի մասn աղջիկներին ավելի ցածր, փոքր արժեք է տալիս, քան տղաներին։ Իսկ հղիության արհեստական ընդհատումներն ընդամենը գործիք են, որի միջոցով նրանք իրականացնում են այդ թերարժևորումը։
Մանուկյանը պատմում է, որ խնդրի կարգավորման համար աշխատել են տարբեր կառույցների հետ, այդ թվում` Հայաստանի կառավարության, նախարարությունների, և այդ աշխատանքն արդյունք տվել է։
«2015թ.–ից հաջողվել է քայլ առ քայլ իջեցնել աղջիկ–տղա հարաբերակցությունը դեպի բնականի։ Ճիշտ է, բնական հարաբերակցությունը դեռ ամբողջությամբ վերակագնված չէ, բայց դրական միտում կա»,–ասում է Մանուկյանը։
Մհեր Մանուկյանը նշում է, որ եթե 2011թ.–ին իրենց կողմից հարցված ընտանիքների միայն 47 տոկոսն էր, ում համար նշանակություն չուներ` հաջորդ երեխան աղջիկ է, թե տղա, ապա արդեն 2017 թ.–ին արված հետազոտությամբ ունեցել են 82 տոկոս արդյունք։ Սա նշանակում է, որ լուրջ ձեռքբերում ունենք։
Մանուկյանն ասում է, որ լուրջ ձեռքբերում ունենք նաև բուն հարաբերակցության առումով. բնական հարաբերակցությունը ենթադրում է 102–106–տղա` 100 աղջկա դիմաց։ 1993 թվականից սկսեց շեղվել հարաբերակցությունը, 2000–ականներին շեղումն ամենամեծն էր` 120 տղա`100 աղջկա դիմաց։ Իսկ այժմ բոլոր օղակների գործակցության արդյունքում 2018 թ.–ի տվյալներով ունենք 111 տղա 100 աղջկա դիմաց։