ԵՐԵՎԱՆ, 1 հոկտեմբերի – Sputnik. ՀՀ աշխատանքի և սոցիալական հարցերի նախարար Զարուհի Բաթոյանի մասնակցությամբ այսօր Երևանի «Նորքի տուն-ինտերնատ» ՊՈԱԿ-ում բացվեց անկողնային հիվանդների համար նախատեսված հարկաբաժինը, որը շահագործման թվականից` 1990–ից ի վեր չէր նորոգվել։
Տուն-ինտերնատի տնօրեն Արթուր Մելքոնյանը նախարարին ներկայացրեց բաժանմունքում կատարված աշխատանքների ընթացքը. բարերարների շնորհիվ հիմնովին փոխվել են խողովակաշարերը, նոր սանհանգույցներ ու լոգարաններ են կառուցվել, իսկ կոսմետիկ վերանորոգումը տևել է մոտ 2 ամիս:
«Սահմանադրությամբ է երաշխավորված տարեցների արժանապատիվ ապրելու իրավունքը». Թաթոյան
«Այժմ բաժանմունքում արդեն տեղադրված է 30 մահճակալ, անհրաժեշտության դեպքում կարող ենք 5-ն էլ ավելացնել: Յուրաքանչյուր սենյակ ունի առանձին սանհանգույց, լոգարան և լվացարան: Մեր տուն-ինտերնատում կա 16 անկողնային հիվանդ, որոնք կտեղափոխվեն այս բաժանմունք»,- ասաց Մելքոնյանը և հավելեց, որ բաժանմունքում իրականացվելու է 24–ժամյա հերթապահություն:
Նախարարը նշեց, որ վերջին շրջանում մարդիկ այս մասնաշենքի լուսանկարները հրապարակել էին Facebook սոցիալական ցանցում և նշել, որ ինտերնատում լուրջ խնդիրներ կան: Նա հետաքրքրվեց Մելքոնյանից` արդյոք հիմա պատրա՞ստ են ՄԻՊ-ի կամ այլ կառույցների անսպասելի այցերին: Մելքոնյանը վստահեցրեց, որ վերանորոգված մասնաշենքն այսուհետ խնդիր չի ունենա:
Նորոգված հարկաբաժնում կգործի նաև «հիշողության սենյակ», որտեղ տարեցները մասնագետների միջոցով կփորձեն մասնակի վերականգել իրենց հիշողությունը:
«Կկազմակերպենք տարատեսակ խաղեր այն տարեցների հետ, որոնք ունեն հիշողության մասնակի կորուստ: Դա մեզ հնարավորություն կտա մեր տարեցների հիշողությունը պահել x մակարդակի վրա, բնական է, որ հիշողությունն ամբողջապես վերականգնել չենք կարող»,- նախարարին տեղեկացրեց հոգեբան Նարե Առաքելյանը:
Բաթոյանը շրջեց ամբողջ բաժանմունքով ու ասաց, որ թերություններ նկատել է, բայց հուսով է, որ դրանք ժամանակի ընթացքում կշտկվեն:
«Առհասարակ Հայաստանը հարմարեցվածության խնդիր ունի: Երևի նկատեցիք, որ ես այս մասնաշենքում անվասայլակով կարողացա տեղաշարժվել»,- ասաց նախարարն ու ավելացրեց, որ ՀՀ աշխատանքի և սոցիալական հարցերի նախարարության ենթակայության տակ դեռ կան հաստատություններ, որոնք ոչ մի տեսակ հարմարեցվածություն չունեն, և ինքը չի կարողանում այդ հաստատություններ այցելել:
Նախարարը շեշտեց, որ տուն-ինտերնատի լոգարանները պետք է հարմարեցվեն:
«Այժմ հատուկ աթոռներ կան, որոնք մեծապես օգնում են հիվանդներին լոգանքի ժամանակ»,– ասաց նա:
Տնօրենը պատասխանեց, որ ունեն, բայց հին են:
«Մենք պետք է այդ ամենը թարմացնենք, մահճակալների խնդիրը լուծենք, տեղաշարժմանն աջակցող սարքեր ձեռք բերենք: Բացի նրանից, որ պարտավոր ենք, նաև ի վիճակի ենք դա անել»,- շեշտեց նախարարը:
Ըստ Բաթոյանի` տարեցները սննդի և հագուստի խնդիր չունեն: Նրանք ավելի շատ ուշադրության և հոգատարության կարիք ունեն:
Sputnik Արմենիան փորձեց զրուցել տարեցների հետ, սակայն նրանցից քչերը համաձայնեցին խոսել, իսկ լուսանկարվել ոչ ոք չցանկացավ, ասացին` լավ օրից չենք հայտնվել այստեղ:
88–ամյա Բավական Պողոսյանն այս տուն-ինտերնատի 7 տարվա բնակիչն է: Վստահեցնում է, որ ամեն ինչից շատ գոհ է:
«Չէի ասի, որ շատ ընկերասեր եմ, շփվում եմ իմ սենյակի բնակիչների հետ: Կարևորը համերաշխ ենք, անգամ լոտո ու դոմինո ենք խաղում, խաչբառ ենք լուծում»,-ասաց նա:
Տուն-ինտերնատում բնակվող տիկին Լաուրան էլ արդեն 2 ամիս է, ինչ այստեղ է ապրում: Կյանքից դժգոհ չէ, ասում է՝ դուք ջահել եք, դուք լավ եղեք:
Տարեցների ու լռության գյուղը. ինչպես են Լիճքում աստիճանաբար մոռանում մանկան ծիծաղը
«Այստեղ ինձ լավ եմ զգում, բոլորս էլ մի բախտի ենք արժանացել: Սնունդ էլ է լավ, վերաբերմունքն էլ: Արդեն հասցրել եմ ընկերներ ձեռք բերել, միասին զբոսնում ենք»,- ասաց նա:
Տուն ինտերնատում Տարեցների միջազգային օրվան նվիրված ճաշկերույթ էր կազմակերպվել, որին միացավ նաև նախարար Բաթոյանը։ Տարեցները երգ ու պարով նշեցին իրենց օրն ու միմյանց առողջություն մաղթեցին: