ԵՐԵՎԱՆ, 27 սեպտեմբերի — Sputnik. Քննչական կոմիտեն վերանայել է ՀՀ նախկին ոստիկանապետ Վլադիմիր Գասպարյանին առաջադրված մեղադրանքը` ավելի խստացնելով այն։ Այս մասին հայտնում է ՀՀ ՔԿ–ն` նշելով, որ մինչ այդ առաջադրված ՀՀ քրեական օրենսգրքի 375-րդ հոդվածի 2-րդ մասով մեղադրանքը փոխարինվել է Քր. օր.375-րդ հոդվածի 1-ին մասով ու 179-րդ հոդվածի 3-րդ մասի 1-ին կետով։
Այլ կերպ ասած, եթե սեպտեմբերի 18-ին առաջադրված մեղադրանքով նախկին ոստիկանապետը մեղադրվում էր պաշտոնեական լիազորությունների չարաշահման համար, որոնք անզգուշությամբ նյութական ծանր հետևանքներ են առաջացրել, ապա այժմ նա մեղադրվում է նույն արարքը շահադիտական, անձնական այլ շահագրգռվածությունից կամ խմբային շահերից ելնելով անելու համար։
Բացի այդ նրան նոր մեղադրանք է առաջադրվել նաև ՀՀ քրեական օրենսգրքի 179-րդ հոդվածով` առանձնապես խոշոր չափի յուրացում ու վատնում կատարելու համար։
Քննչական կոմիտեն մեկ այլ հետաքրքրական հանգամանք էլ է հայտնում նշված քրեական գործից։
Վլադիմիր Գասպարյանի նկատմամբ քրեական հետապնդումը դադարեցնելու միջնորդություն է ներկայացվել
«Նախաքննության ընթացքում ՀՀ երրորդ նախագահի եղբոր՝ Ալեքսանդր Սարգսյանի կողմից ամբողջությամբ՝ 54.790.433 դրամի չափով, վերականգնվել է Վլադիմիր Գասպարյանի և այլ պաշտոնատար անձանց հանցավոր գործողությունների արդյունքում պետությանը պատճառված վնասը»,– գրված է պաշտոնական հաղորդագրության մեջ։
«Սաշիկն այդ ընտանիքի ամենաանմեղ դեմքն է». Փաշինյան
Հիշեցնենք`Վլադիմիր Գասպարյանին մեղադրանք էր առաջադրվել այն բանի համար, որ 1997թ. հունիսից մինչև 2011թ. նոյեմբերը, զբաղեցնելով ռազմական ոստիկանության պետի, ապա պաշտպանության փոխնախարարի պաշտոնը, տեղյակ է եղել, որ ռազմական ոստիկանության զորամասի 3 զինծառայողներ 2001, 2004, և 2009թթ.-ից աշխատանքի են ընդունվել, բայց նշանակման օրվանից չեն ներկայացել ծառայության։
Դրա փոխարեն նրանցից մեկն աշխատել է ՀՀ երրորդ նախագահ Սերժ Սարգսյանի եղբայր Լյովա Սարգսյանի մոտ` որպես վարորդ, մյուս երկուսը՝ Սերժ Սարգսյանի եղբայր Ալեքսանդր Սարգսյանի թիկնապահներն են եղել։
Վլադիմիր Գասպարյանը ոչ միայն համապատասխան իրավական ընթացք չի տվել այդ հանգամանքներին, այլև 2010 թվականի դեկտեմբերի 3-ին 5 տարի ժամկետով երկարաձգել է նրանցից մեկի զինծառայության ժամկետը:
Այս ապօրինությունների արդյունքում ՀՀ երրորդ նախագահի եղբայրների աշխատակիցներին պետական բյուջեից վճարվել է ընդհանուր 21.691.481 ՀՀ դրամ գումար։