ԵՐԵՎԱն, 15 սեպտեմբերի-Sputnik. Անվտանգության նկատառումներից ելնելով՝ Զբոսաշրջության կոմիտեն հորդորում է խուսափել մոտ օրերս դեպի Արագած վերելքներ իրականացնելուց: Այս մասին կոմիտեն տեղեկացնում է Facebook-ի իր պաշտոնական էջում՝ նշելով, որ հարցի վերաբերյալ խորհրդակցություն է անցկացվել նաև Ալպինիզմի հայկական ֆեդերացիայի և պատասխանատու այլ կառույցների մասնագետների հետ:
Հաղորդագրության մեջ կոմիտեն նաև նախազգուշացնում է, որ հետագայում վերելքներ կատարելիս անհրաժեշտ է խստորեն պահպանել անվտանգության կանոնները, մասնավորապես.
- Բարձրանալ մեծ խմբերով,
- Վերելք կատարել միայն փորձառու գիդի ուղեկցությամբ,
- Տեղաշարժվել միայն լեռնային արահետների ուղղությամբ,
- Վերելք կատարելուց առաջ նախապես տեղեկացնել «911» ծառայությանը կամ Ալպինիզմի և լեռնային տուրիզմի ֆեդերացիային։
Հիշեցնենք, որ սեպտեմբերի 14-ին ողբերգական դեպք է տեղի ունեցել Արագած լեռան վրա: Ժամը 14:26-ին «911» ծառայությունը Լեհաստանի Հանրապետության քաղաքացի Մարգո Ժ.-ից ահազանգ է ստացել, որ ինքն ու ընկերը (նույնպես Լեհաստանի Հանրապետության քաղաքացի) բարձրացել են Արագած լեռ, արջը հարձակվել է իրենց վրա։
Հայաստանում որպես զբոսաշրջիկ գտնվող ազգությամբ լեհ տղան իր նշանածի հետ բարձրացել է Արագած լեռ։ Մոտ 3500 մետր բարձրության վրա արջը հանկարծակի հարձակվել է նրանց վրա։
Արջը, որն ամուր բռնել է տղային, սկսել է գլորվել ու տղայի հետ ժայռից գահավիժել է ցած։ Աղջիկն անմիջապես ահազանգել է փրկարարական ծառայություն։
Դեպքի վայր եկած հրշեջ-փրկարարներն ու իրավապահները հայտնաբերել են երիտասարդի դին, որի գլուխն անճանաչելիորեն ջնջխված է եղել։
Արագած լեռան վրա արջի հարձակման զոհ դարձած երիտասարդը 33 տարեկան էր. նոր մանրամասներ
Sputnik Արմենիայի տեղեկություններով` արջի հարձակման զոհ դարձած տղամարդը 33 տարեկան էր և ապրում էր Լեհաստանի մայրաքաղաք Վարշավայում: 31-ամյա նշանածը նույնպես Վարշավայի բնակիչ է: