Չուլջյանը նշում է, որ ամեն տարի Ադրբեջանի կառավարության կողմից աշխատանք է տարվում ՝ ճնշում բանեցնելու ԱՄՆ-ի արտաքին գործերի նախարարության և այդ գերատեսչության մարդասիրական օժանդակություն հատկացնող թևի վրա, որպեսզի կանխեն ամերիկյան կողմի աջակցությունն Արցախին:
Առաջին անգամ Արցախին ԱՄՆ-ն օժանդակություն տվեց 1998թ.-ին. դրանից ի վեր` վերջին 21 տարիների ընթացքում միշտ այդ ճնշումը եղել է: Այս տարի ևս Ներկայացուցիչների պալատը հստակ բանաձև ընդունեց, որպեսզի 2020թ.-ին 1,5 մլն դոլար ուղարկվի Արցախ՝ ականազերծման աշխատանքներ իրականացնելու համար: Հերթական անգամ ադրբեջանցիների կողմից ճնշում գործադրվեց: Եղիսաբեթ Չուլջյանի տեղեկացմամբ՝ Ամերիկայի հայկական համայնքն ու Հայ Դատի Հանձնախումբն անշուշտ լծված են այն գործին, որպեսզի նման գործելակերպը չշարունակվի ու կասեցվի, և ընդհակառակը՝ Արցախին տրվող օժանդակությունը լինի շարունակական ու ընդլայնվի:
«Այս շաբաթ աշխատանքներ ենք տանում Կոնգրեսի Ներկայացուցիչների պալատի միջոցով: Կոնգրեսականներ Քոքսն ու Շերմանը նամակ են պատրաստել, որպեսզի հղեն ԱՄՆ-ի արտաքին գործերի նախարարության այն թևին, որն օժանդակություն է ուղարկում Արցախ: Աշխատում ենք, որպեսզի այլ կոնգրեսականներ զորավիգ լինեն ու ստորագրեն նամակի ներքո: Ակնկալում ենք, որ մինչև ուրբաթ նրանց թիվ կավելանա: Զուգահեռաբար շարունակում ենք մեր աշխատանքները Սենատում: Ներկայացուցիչների պալատում արդեն քննարկվել է Հայաստանին 40 մլն և Արցախին 1,5 մլն դոլար հատկացնելու հարցը: Ցանկանում ենք սեպտեմբերին նման առաջադիմություն տեսնել նաև Սենատում, երբ սենատորները վերադառնան արձակուրդից»,-հայտնում է Ամերիկայի Հայ Դատի Հանձնախմբի մամլո քարտուղարը:
Եղիսաբեթ Չուլջյանը շեշտում է այն հանգամանքը, որ Ամերիկյան կառավարությունը վերջին տարիներին ու նաև նախորդած 20 տարիների ընթացքում որդեգրել է այն պատգամը, որ արցախյան խնդրում պետք է լինի արդար հանգուցալուծում և պետք է արդար վարվել Արցախի ժողովրդի հետ, այն չի կարող միակը լինել տարածաշրջանում՝ զրկված ԱՄՆ-ի օժանդակությունից:
«Օժանդակությունը ոչ միայն կարևոր է խաղաղության հաստատման առումով, այլև հենց արցախահայության համար: Սա առաջին հերթին անհրաժեշտ է ականազերծման աշխատանքների համար, որոնց շնորհիվ բազմաթիվ կյանքեր են փրկվել, ու մարդիկ սկսել են ապրել ավելի անվտանգ պայմաններում»,- համոզված է Հայ Դատի Հանձնախմբի մամլո քարտուղարը:
Ինչ վերաբերում է Հայաստանին, ապա ԱՄՆ-ի կառավարությունը ֆինանսական օժանդակության կրճատման գործելակերպ է որդեգրել աշխարհի գրեթե բոլոր տարածաշրջանների նկատմամբ: