ԵՐԵՎԱՆ, 28 հունիսի — Sputnik. Կալանքը կրելու ժամանակ գեներալ Մանվել Գրիգորյանն անդամալույծ է դարձել և չի կարողանում քայլել, ավելին` նրա մոտ սթրեսային խանգարում կա: Այսօր` լրագրողների հետ հանդիպման ժամանակ, այս մասին ասաց Գրիգորյանի պաշտպան Լևոն Բաղդասարյանը։
«Այն, որ Գրիգորյանի առողջական վիճակը կալանքի ժամանակ վատացել է, ու հիմա նրա կյանքին վտանգ է սպառնում, այդ մասին ասում են ոչ միայն դրսի, այլ նաև տեղացի բժիշկները։ Կարծում եմ` նրան միտումնավոր են կալանքի տակ փորձում պահել, քանի որ նրա պաշտպանական կողմը քանիցս բարձրաձայնել է, որ կալանքն անհամատեղելի է նրա հիվանդությունների հետ»,–ասաց պաշտպանը։
Բաղդասարյանի խոսքով` Գրիգորյանն այժմ այն վիճակում է, որ անգամ բժիշկը խորհուրդ չի տալիս նրա հետ խոսել քրգործին առնչվող ինչ-ինչ հարցերի շուրջ։
Պաշտպանը նշեց նաև, որ հունիսի 21–ին ՄԻԵԴ–ը կրկին որոշում է կայացրել, ըստ որի` ՀՀ–ն պարտավորվում է Գրիգորյանի բուժումը կազմակերպել հիվանդանոցային պայմաններում: Բաղդասարյանը հիշեցրեց, որ ՄԻԵԴ–ն Գրիգորյանի հետ կապված արդեն իսկ երկու նման որոշում կայացրել է` ՀՀ–ին պարտավորեցնելով Գրիգորյանի բուժումն իրականացնել քաղաքացիական հիվանդանոցում, ոչ թե դատապարտյալների։
Անվասայլակով ու թթվածնի սարքով. Մանվել Գրիգորյանը ներկա է դատական նիստին
«Եթե դատարանը Գրիգորյանի խափանման միջոց կալանավորումը չփոխի, մենք նորից ստիպված կլինենք ՄԻԵԴ դիմել»,–ասաց Բաղդասարյանը։
Հիշեցնենք, որ Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։