ԵՐԵՎԱՆ, 27 հունիսի — Sputnik. Մայիսին Հայաստանի տնտեսությունն արձանագրել է 7.3 տոկոս տնտեսական ակտիվություն։ Այսօր կառավարության նիստի օրակարգին անցնելուց առաջ հայտարարեց ՀՀ վարչապետ Նիկոլ Փաշինյանը` կարևորելով այդ ցուցանիշի բովանդակային մասը։
«Ուզում եմ արձանագրել, որ մայիսին, նախորդ տարվա մայիսի նկատմամբ, ունեցել ենք 15 տոկոսանոց աճ։ Իսկ հունվար–մայիս ամիսներին նախորդ տարվա հունվար–մայիսի նկատմամբ` 0.1 տոկոսանոց աճ, ինչը նշանակում է, որ մենք այս տարի արտահանման հետ կապված պրոբլեմները հաղթահարել ենք»,- ասաց Փաշինյանը։
Նա նաև նշեց, որ տարվա արդյունքներով կանխատեսվում է արտահանման աճ։ Ընդ որում, եթե 2018թ–ին արտահանվող ապրանքների մեջ մշակող արդյունաբերության արտադրանքը կազմում էր 62.8 տոկոս, ապա այս տարի այս ոլորտի ցուցանիշն արտահանվող ապրանքների ծավալում աճել է շուրջ 30 տոկոսով։ Իսկ միջին տեխնոլոգիատարությամբ ապրանքների ծավալն աճել է շուրջ 20 տոկոսով։
Ավելացել են նաև գյուղապրանքների արտահանման ծավալները` նախորդ տարվա համեմատ շուրջ 70 տոկոսով։ Ամենամեծ ծավալը կազմել են լոլիկը, վարունգը, ելակը, թարմ ձուկը։
«Այս թվերը ցույց են տալիս, որ Հայաստանի տնտեսական դաշտն ընկալել և մարսել է տնտեսական հեղափոխության վերաբերյալ կառավարության մեսիջները»,– ասաց վարչապետը։
Փաշինյանի դիտարկմամբ`գործարարները կառավարության մեսիջները ճիշտ են ընկալել, այժմ հերթը պետական համակարգինն է։ Տնտեսությունն ու պետական համակարգը պետք է սկսեն գործել համահունչ կերպով։
ՀՀ վարչապետը նաև նշեց, որ արտահանման հիմնական ուղղություններն են ՌԴ–ն և ԵԱՏՄ երկրները, երկրորդ տեղում արդեն ԵՄ անդամ երկրներն են։ Փաշինյանը հայտնեց, որ այս ուղղությամբ քննարկումներ է ունեցել ՌԴ նախագահի ու վարչապետի, ինչպես նաև Վրաստանի վարչապետի հետ։ Նրա խոսքով` այդ երկրներում Հայաստանի հետ պայմանավորվածությունները ճշգրիտ կյանքի են կոչվում, ինչի համար Փաշինյանը շնորհակալություն հայտնեց իր գործընկերներին։