Երազիկ Հայրիյանը կարծում է, որ «Դիզակի գույները» միջազգային նկարչական սիմպոզիումը խթան կդառնա Արցախում զբոսաշրջությունը զարգացնելու համար։
«Առաջին անգամ միջոցառումը կազմակերպեցինք 2017 թվականին, մասնակցեցին 10 նկարիչներ Արցախից և Հայաստանից և արդեն հաջորդ տարին, ոգևորված մեր հաջողություններով, փորձեցինք միջազգային բնույթի կազմակերպել», ասում է նա։
Նրա խոսքով՝ գաղափարը ծնվել է 2016 թվականին Քարվաճառի թատերախմբի ղեկավարի հետ հանդիպման ժամանակ, և արդեն այս տարի սիմպոզիումին մասնակցել են 8 երկրի նկարիչներ՝ մոտ 15 հոգի:
«Նկարիչներին տրվում է տեղում աշխատելու հնարավորություն և տրվում են բոլոր անհրաժեշտ պայմանները, միայն թե նրանք մեզ վերջում 4 կտավ նվիրեն: Այս տարի արդեն ունենք մեծ հավաքածու՝ մեր կտավների քանակը կանցնի 150-ը»,- նշում է Երազիկ Հայրիյանը:
Ինչ վերաբերում է այն հանգամանքին, որ Արցախ ժամանողները կարող են հայտնվել Ադրբեջանի «սև ցուցակում», ըստ բանախոսի, արվեստագետներին նախօրոք զգուշացվում է, որ իրենք կարող են հայտնվել սև ցուցակում: Նա ընդգծում է, որ նման միջոցառումները շատ կարևոր են, քանի որ Արցախն ավելի ճանաչելի են դարձնում:
Հայրիյանը նշում է, որ երիտասարդները Հադրութում զբաղվածության խնդիր ունեն, դրա պատճառով էլ երբեմն արտագաղթում են: Միաժամանակ բանախոսն ընդգծում է, որ Հադրութի շրջանի երիտասարդներին հատուկ է հայրենասիրությունը, մեծամասնությունը տեղում ապրում է, զբաղվում է գյուղատնտեսությամբ:
«Մեր բաժինը երիտասարդների համար կազմակերպում է թե ժամանցային, թե ինտելեկտուալ միջոցառումներ, արշավներ, ուխտագնացություններ: Փորձում ենք ամեն ինչ անել, որպեսզի ավելի հետաքրքիր դարձնենք մեր երիտասարդների առօրյան» - ընդգծում է նա:
«Դիզակի գույները» խորագրով միջազգային նկարչական սիմպոզիումը անցկացվել է Հադրութում հունիսի 10-ից 17-ը։ Փակումը տեղի է ունեցել հունիսի 17-ին Հադրութի Տնջրու ծառի տարածքում:
Փակման ժամանակ կազմակերպվել են ցուցահանդես, փոքրիկ համերգներ:
«Շուտով մենք կունենանք պատկերասրահ, հադրութցիներից մեկը մեզ նվիրել է իր հայրական տունը, որը շրջանի Տայք գյուղում է, և ընտրված նկարները հետագայում կտեղափոխենք այդ պատկերասրահ»,– ասում է Հադրութի շրջանի վարչակազմի մշակույթի և երիտասարդության հարցերի բաժնի վարիչը:
Ծրագրերն իրականացնելու համար օգնում է Արցախի Հանրապետության մշակույթի, երիտասարդության հարցերի և զբոսաշրջության նախարարությունը, ինչպես նաև շրջանի վարչակազմը: