ԵՐԵՎԱՆ, 18 ապրիլի — Sputnik. Որպես մարզպետ այս 2 ամիսների ամենահաճելի պահն ինձ համար եղել է որդեգրության փաստաթղթի վրա կնիք դնելը: Այս մասին այսօր ասաց Շիրակի մարզպետ Տիգրան Պետրոսյանը Գյումրիում «Ընտանեկան միջավայր և համայնքային ծառայություններ Հայաստանի երեխաների համար» ծրագրի մեկնարկին:
Ծրագրի շրջանակում նախատեսվում է աջակցել ՀՀ կառավարությանը՝ Հայաստանում գործող գիշերօթիկ խնամքի հաստատությունները և հատուկ դպրոցները այլընտրանքային խնամքի ծառայության ձևափոխելու և կյանքի դժվարին իրավիճակներում հայտնված երեխաներին նպաստելու համար։
«Յուրաքանչյուր երեխա իրավունք ունի բարեկեցիկ և ապահովված կյանքով ապրելու, պաշտպանված լինելու։ Մեր բոլորի աշխատանքներն ու ջանքերը պետք է միտված լինեն այս խնդիրների լուծմանը: Երեխան պետք է մեծանա ընտանիքում, իսկ դրա անհնարինության դեպքում` ընտանիքին մոտ միջավայրում»,- ողջունելով ծրագիրը` հանդիպման ընթացքում նշեց մարզպետ Պետրոսյանը: Նա ուրախությամբ պատմեց, որ հենց երեկ մի ծնող դիմում էր գրել, որ գիշերօթիկ հաստատությունից իր 2 երեխային ընտանիքի վերադարձնի: «Սա ամենահաճելի պահն էր ինձ համար»,–ասաց Պետրոսյանը:
Շիրակի մարզում ծրագրի շրջանակում աշխատանքներ պետք է իրականացվեն 2 գիշերօթիկ հաստատությունում, 2 հատուկ դպրոցում և բոլոր հանրակրթական դպրոցներում: Արդյունքում այս հաստատություններում ապրող երեխաները հնարավորություն կստանան ապրելու և դաստիարակվելու ընտանեկան միջավայրում՝ միաժամանակ օգտվելով հասանելի համայնքային ծառայություններից։
«Ընտանեկան միջավայր և համայնքային ծառայություններ Հայաստանի երեխաների համար» ծրագիրը աշխատելու է խնամակալ ընտանիքների ինստիտուտի ներդրման և հզորացման ուղղությամբ։ «Եթե հնարավոր չլինի երեխաներին վերամիավորել իրենց ծնողների կամ խնամակալ ընտանիքիների հետ, ապա ծրագրի շրջանակներում նախատեսվում է ընտրել և վերապատրաստել խնամատար ծնողների և երեխաներին տեղավորել հնարավորինս նպատակահարմար խնամատար ընտանիքներում: Սա մի մոդել է, որ արդեն իսկ ներդրվել է այլ մարզերում։ Համոզված ենք, որ կգտնենք հոգատար թեկնածու ծնողներ», - նշեց ՀՕՖ Երեխաների կենտրոնի տնօրեն Միրա Անտոնյանը:
Ծրագիրը նախատեսվում է իրականացնել վեց մարզում՝ Սյունիք, Լոռի, Շիրակ, Արմավիր, Կոտայք և Գեղարքունիք: Ներկայումս ծրագրի թիրախ մարզերում երեխաների խնամքի հատուկ հաստատություններում ապրում է 1215 երեխա (54%-ը՝ տղա և 46%-ը՝ աղջիկ): Ծրագիրն իրականացնում են Վորլդ Վիժն Հայաստանը, «Հույսի կամուրջ» հասարակական կազմակերպությունը և «Երեխաների աջակցության կենտրոն» հիմնադրամը: Ծրագիրն իրականացվում է Աշխատանքի և սոցիալական հարցերի և Կրթության և գիտության նախարարությունների հետ սերտ համագործակցությամբ և Եվրոպական միության ֆինասավորմամբ:
Նշենք, որ դեռ 2003թ.-ին ՀՀ կառավարությունը արձանագրեց, որ մանկական խնամակալական կազմակերպություններում պահվող երեխաների թիվն աճում է, ընդ որում`հաստատությունները համալրվում են «սոցիալական որբերով»: Արդյունքում ՀՀ կառավարությունը հաստատեց «Երեխաների խնամքի հարցերով զբաղվող հաստատությունների բարեփոխման պետական ռազմավարական ծրագիրը» հաստատելու մասին որոշումը: Ռազմավարական ծրագրի կատարումն ապահովող միջոցառումների ցանկում տեղ գտավ «Մանկատների բեռնաթափում» ձևակերպումը: Երեխաներին մանկատներից ընտանիք վերադարձնելու փորձեր ՀՀ կառավարությունը սկսել էր դեռ 2016 թվականից, սակայն այդ ժամանակ շատ հարցեր թերի էին, ու չկային նմանատիպ ծրագրեր: