ԵՐԵՎԱՆ, 30 հունվարի — Sputnik. Հայկական ընտանիքի պատմությունը, որը թաքնվել էր Հաագայի բողոքական եկեղեցում` արտաքսումից խուսափելու համար, երջանիկ ավարտ է ունեցել։ Այդ մասին հաղորդում է Dutch News պարբերականը։
Նշենք, որ ավելի վաղ լայն արձագանք էին ստացել երկու հայկական ընտանիքների գործերը, որոնց սպառնում էր արտաքսում։ Առաջին դեպքում Հովիկը և Լիլին իրավունք են ստացել մնալ երկրում։ Նրանց մայրը՝ Արմինե Համբարձումյանը, արտաքսվել է Հայաստան։ Երկրորդ դեպքում Թամրազյանների ընտանիքը Հաագայում թաքնվել էր բողոքական եկեղեցում։ Այստեղ քահանաները շուրջօրյա պատարագ էին մատուցում, որպեսզի ոստիկանությունը չկարողանա մտնել եկեղեցի։
Եվ ահա հունվարի 30–ին հայտնի է դարձել, որ Հաագայի բողոքական եկեղեցում Թամրազյանների ընտանիքին օգնելու պատարագն ավարտվել է։ Նիդեռլանդաների կառավարությունն այս շաբաթ որոշում է ընդունել բնակության իրավունք տրամադրել ավելի քան 600 փախստական երեխաների և նրանց ծնողներին, այդ թվում` Թամրազյան ընտանիքին։
Այսպիսով, հայկական ընտանիքին ապաստարան տված եկեղեցին ավարտել է պատարագը, որը տևել է 96 օր։
Ստացված տեղեկության համաձայն, եկեղեցու հոգևորականը շնորհակալություն է հայտնել երկրի իշխանություններին ընդունած որոշման և փախստականներին աջակցելու համար, որոնք նույն իրավիճակում էին։
Ինչպես հայտնի է, Թամրազյանների ընտանիքը 2010թ–ից բնակվում էր Նիդեռլանդներում։