ԵՐԵՎԱՆ, 30 հունվարի – Sputnik. ԱԺ նախկին պատգամավոր, «Շշի Մելո» մականվամբ Մելիք Մանուկյանին պատկանող «Պարտեզ» ռեստորանային համալիրում երեկ հնչած կրակոցներից հետո որպես կասկածյալներ ձերբակալվել են Աբովյան քաղաքի 11-րդ փողոցի բնակիչ, 24-ամյա Շանթ Մելիքի Մանուկյանը և Աբովյան քաղաքի Երիտասարդական փողոցի բնակիչ, 35-ամյա Արթուր Վարդանյանը։ Այս մասին հայտնում է shamshyan.com–ը։
Կայքի տեղեկություններով՝ երեկ՝ հունվարի 29-ին, ձերբակալվել է Շանթ Մանուկյանը, որը նախկին պատգամավոր Մելիք Մանուկյանի որդին է։
Armtimes.com–ն էլ գրում է, որ ռեստորանային համալիրի մոտ տեղի ունեցած զինված միջադեպի հետևանքով 7 վիրավորներից 5-ը նույնպես պատգամավորների հարազատներն են, մյուս երկուսը հակառակորդ կողմից են: Ըստ ԶԼՄ–ի` միջադեպի հետևանքով հրազենային վիրավորում են ստացել Մանուկյանի եղբորորդին և քրոջ որդին:
Ըստ նախնական տեղեկությունների՝ դեպքի օրը Աբովյանում գտնվող վուլկանիզացման կետում վիճաբանություն է տեղի ունեցել «Շշի Մելոյի» ազգականների և աշխատակիցների միջև: Աշխատակիցները դժգոհել են նրանց խոսելու տոնից, ինչն էլ վիճաբանության պատճառ է դարձել. կողմերը պայամանվորվել են ուշ ժամի հանդիպել «Պարտեզ» ռեստորանի տարածքում ու շարունակել խոսակցությունը: Արդեն ռեստորանի տարածքում վիճաբանությունը վերածվել է փոխհրաձգության:
Դեպքի վայրից տարբեր տեսակի փամփուշտներ են հայտնաբերվել, ինչն էլ նշանակում է, որ դեպքի վայրում տարբեր զենքեր են աշխատել: Թե ովքեր են եղել կոնկրետ կրակոց արձակողները, դեռ հայտնի չէ:
Հիշեցնենք, որ զինված միջադեպի հետևանքով սպանվել է 30-ամյա Արտաշես Գևորգյանը: Նա Աբովյան քաղաքի բնակիչ էր, ընտանիքի կրտսեր որդին:
Հիշեցնենք, որ կրակոցները հնչել էին հունվարի 29-ին, ժամը 01:30-ի սահմանում։ Ոստիկանության Աբովյանի բաժինն ահազանգ էր ստացել Աբովյանի և Երևանի մի քանի հիվանդանոցներից, որ հրազենային և մարմնական վնասվածքներով իրենց մոտ են տեղափոխվել մի քանի քաղաքացիներ, մեկը`մահացած վիճակում:
Սպանության փաստով հարուցված քրեական գործը Հայաստանի քննչական կոմիտեի նախագահ Հայկ Գրիգորյանի որոշմամբ փոխանցվել է Հայաստանի քննչական կոմիտեի հատկապես կարևոր գործերով քննության գլխավոր վարչության վարույթ։